Abebech Maatewoos
Addis Ababa: Cancishaanchu HWHT fanino oli Itophiya diigate aana illacha assinoha ikkasinni baalanta Itophiyu daga la“anno tii`u ola ikkasi wodiidi daganna dagoomi qaqqowu jireenyu paarte borro mini sooreessi Kalaa Xilahun Kebbedehu xawisi.
Kalaa Xilahun Kebbedehu Itophiyu pireesete uurrinshara xawisino garinni; cancishaanote gaamo Itophiya laafisa sa“eno diigate aana illacha assitino gawajjo iillishasinni, baalanti Itophiyu daga fannoonninke ola qeelate karsantara hasiissanno.
Kalaa Xilahun Kebbedehu xawishi gede ikkiro; wodiidi daganna dagoomi qoqqowu daga cancishaanote uurrinsha hunne latishshu widira alba higa noonke yitanno uurrinsha aana no. Gobbaydi wolquwa laafanna insa yitannore adhe gumultanno mootimma safatenna tenne harinshonni agawo lede tugate Ameeriku mootimma assitanni noo millimillo daga hanqissinota ikkitino.
Cancishaanchu HWHT Itophiyu polotikira buutaamo ikkasinni; mittoho woy gama bissara agurranniha dikkino yiinohu Kalaa Xilahun; Itophiyu daga baalanti mitto ikkine konne hemaancho hunatenna bushshu woroonni madaarate tii`u gaadira biso ikka noonke yiino.
Wodiidi daganna dagoomi qoqqowu mootimma kunni tii`u olira cancishaano HWHT iillishino horronni luphima gawajjo iillitinonsa Amaarunna Affaarete qoqqowubbara jiro gamba asse basete geeshsha maratenni woxunna addi addi kaa`lo assatenni rodiimma leellishino yiino. Tini kaa`lo olunni daramino manni umonsa dandaanno geeshsha sufannoha ikkasino buuxisiisino.
Sooreessu xawishshi garinni; meentu moola sagale qixxeessatenni, qoqqowoho loossanno mootimmate loosaasine qoodansa aatenni hattono 16 kume ale ikkitanno qoqqowi giddo noo massagaanono mittu aganiha damooza aatenni hale ikkansa leellishshino. Danunninna woxunnino boco miiliyoone birra meddi yitanno jiro gamba assatenni wolqa ikka dandiinoonnita egensiisino.
Aanteteno daga gobba qarru giddo no yite yaaddanni ikkikkinni loosonsa loossanni gargarooshshe irkisa hasiissannonsa yiino. heeshote wuddinnatenna dikkote aana nooha qarra ti`rate latishshunni baatto loosi`re galinohu irshasi loosanni wole latishshu loosubbano gumulanno gede woshshatto shiqishino.
Bakkalcho Wocawaaro 20, 2014
