Amsaalu Felleqe
Addis Ababa:- Gobbaydi wolquwa Itophiyu aana iillishate wo’naaltanno xiiwo wolu garinni kadote gashshootensa gumu’late sokko nooha ikkasi Hawaasi yuniversite pirezidaantichi Dr. Ayyaano Baraasohu xawisi.
Pirezidaantichu baxxinohunni Itophiyu Pireesete Uurrinshara xawisino garinni; gobbaydi wolquwa hasattonna illachinsa Itophiyu aana hasidhu yannara hasidhinore assi’rate dandiissannonsaha soqqamaanchonna laafa mootimma kalaqate.
Itophiyu kadote gashshootinni galtinokkinna jawanna ayirrado gobba ikkase ledo amadisiisame miinjise lexxanninna lophanni ha’riro Galchimi kalqe gobbuwanni bidhattote gede la’nanni. Abbay haaroo’mate kofattono xintamasenni hanafe xaphooma womaashshu fulo Itophiyu qansootinni calla fulo assinanni loonsanni hee’noonniha ikkaseno hasi’ra hooga wole widoonni xiiwo kalaqate kaima ikkinotano qummi assino.
Itophiyu umise wolambinatenna ayirrinye agarsiisidhe kaajjado gobba ikikite hegeraa’ma noose; Ameerikuno agawo tugate hedase ani yoommare calla adhitinanni gumulle yitanno waajjishiishshaatino yino pirezidaantichu.
Agawo tunganni yee ammanannokkitano qummi assinohu pirezidaantichu; gobbanke hajo lainohunni duuchunku Itophiyu qansooti gobbasi daafira seekke xawisanna huwachishatenni dippilomaasete aana illachinshe loosa noonke yinohu Dr Ayyaano; cancishaanchu HWHT keeraano qansootanke raafatunni shaanninna horranni afamanno; baara widi gobbuwara heedhannori Itophiyu qansootinna ilama cancishaanchu HWHT hunote assootesi kalqete dagoomira xawisatenni dippilomaasete looso kaajjishshe loossara agarrannitano qummi assino.
Agawo tungirono miinjunna poletiku agawo ikkitara dandiitanno. Miinju agawo yine la’neemmohu qarunni sagaletenni umo dandaate ledo amadisiisaminoha ikkinohura sagaletenni umonke dandaate hixamanyine loonsiro dagganno xiiwono dandiinanniha ikkasi kulino.
Dr. Ayyaano xawishshi garinni; babbaxxitino maashinnanna olu uduunne hidhineemmokki gede agawo tunganniha ikkoommero xibbuunni 67 anga ikkanno daddalu soorro assina’nannihu Iisiyu gobbuwa ledo ikkinohura hala’lado illacha kuri gobbuwa widira tuqqa dandiinanni.
Gobbaydi gobbuwa xiiwo hattono Ameeriku tugeemma yitanni noo agawo dandaate sgobboomitte mittimmanna giddoydi kaajjillenke dhaabbachishi’ra jawa qeecha afidhino; wolootu gobbuwa ledo noonke xaadooshsheno kaajjishi’ra hasiissannonke yino. Itophiyu latishshunni, dippilomaasetenna poletiku handaarranni kaajjituro iillinshanni xiiwo mittoreno gawajjo iillishshukkinni sa’anara dandiinannitano Dr. Ayyaano lede xawisino.
Bakkalcho Wocawaaro 20, 2014
