Amsaalu Felleqe
Addis Ababa:- Olu Itophiya diingeemmo yitanno wolqanna Itophiyu jawa gobbaatina diiga didandiitinanni yitanno wolquwa mereero assinoonniha ikkasi IFDR Olu wolquwa Layinki Xaphoomu Itaamaazhoor Shuumichi Leetenaal Jeneraal Abebaw Taaddesehu xawisi.
Leetenaal Jeneraal Abebaw Taaddesehu ‘’የጥፋት ገጾች’’ /Hunote wolquwa/ yaannohunni Faanu Televizhiine loossino odeessancho filmera shiqe xawisino garinni; cancishaanchu HWHT hanafino oli illachi Itophiya diigate ikkanna ninke amandoommo doogo kayinni Itophiya diigamatenni gatisate.
Gobbate aana fannoonni ola rabbisatenni seeru qaafo adha gara ikkaserano kaimu konneeti yino Layinki Xaphoomu Itaamaazhoor Shuumichi Abebaw Taaddesehu.
Cancishaanchu HWHT ola fanara albaanni amade keeshshino illachi horosi agarsiisa’rate Itophiyu aana jawa xiiwo kalaqate dandiissitannosi injoo nooro ledo loosatenna Itophiyu daganna mootimma wolqatenni anga micciire amade umisi hasatto wonshi’rate; kuni ikka hoogiro kayinni Itophiya diigate ikkinotano xawisino.
Cancishaanchu wolqa konni hunote assootisira qodhaano hasiissannoe yaatenni qoqqowunnita addi wolqa horonsi’re 200 kumi ale ikkanno manni noo wolqa tanta’ninonka; kayinnilla jawa wolqa assi’rinohu sircho ikkanna ninketi jawa wolqanke kayinni Itophiyimmate yino.
Itophiyimmate tii’’i kayinni gargarooshshu qodhanchimmakki uddano uddidhe heedhe atente gede uddi’rino jaalikki badheenni ganannohe woyte kalaqanno macciishshamme no; konnirano noonke wolqa horonsi’ne qasammoommo yino. Konni ragaanni worroommo gumulo jeefisate qafadantino miillanke agursiinsoommo; adhinoonninkeha olu uduunne qolsiinsoommo; Itophiyano gatinsoommo yino layinki xaphoomu Itaamaazhoor Shuumichi.
Cancishaancho HWHT uurrinshate gedee akati hee’rannosikki gede billallinsoommo; barbadeessinannihano shakki assinoommo; Itophiya diigate qodhe kainoha uurrinshate mudukkosa tayinseenna sammichosi ganame yeedaalate gede balete e’’e maaxamino; gattinoreno buluushshinoommo yinohu Leetenaal Jeneraalichu; Itophiyu gido ayino ikkiro hasi’rino hedo xawiso, hiittenne amma’nono ikkito poletika harunso ninke eessa nnonkeri dino; Itophiya kisiro kayinni gobbaydi manninni ikkikkinni umisi aana qaafo adhatenniiti; uminke mini ishine fiinummokkinni Itophiyanke gobbate gede
hegereessine uurrisa dandiineemmokkihuraati yaanniiti xawisinohu.
Bakkalcho Wocawaaro 20, 2014
