Yaareed Geetaachew
Sidaamu Qoqqowi Amaale mini techo Haaro mootimma safannoha ikkanna bero hawarro albi amaalete mini miilla ayirrinyunni geegiissino.
Amaalete mini miilla ayirrinyu geego lainohunni Bakkalcho gaazeexira xawishsha uyinohuna bero geeshsha qoqqowaho Amaalete mini qara songaaficha ikke massaganni keeshshinohu kalaa Selemooni Laallehu,Sidaamu qoqqowi Amaale mini miilla Sidaamu daga wolaphoranna lophora seeda diro sharrantanni dagginore ikkansanni baxxino galati hasiisannonsata xawisino.
Sidaamu sa’u yannara baca waaga baatatenni umisi umosi gashshate deerra iille wocawaaro 20 /2014 M.Dirnii haaro mootimma safasi harunse, Sidaamu zoonete deerrinni hee’reenna hanaffe techo geeshsha Amaalete mini miilla ikkite Sidaamaho sharrantanni daggu miilla dhagge habbannokki malaate tugge sa’inoreeti yino kalaa Selemooni.
Sidaamu wolaphote xa’mo wo’munni wo’ma soorrote gashshootinna seeda yanna sharronni afi’rino yinohu kalaa Selemooni, xa kayinni qoqqowaho jawa latishshunna danchu gashshooti xa’mo dawarate haaro somamanno amaalete mini illacha tuge loosa hasiissanno yaanni sokkasi sayisino.
Daga ikkannoenna massagannoe;hattono Itophiya albaagissanno yite hexxitino Jireenyu Paarte doodhansa Haaru amaalete minira jawa eeggonna dinyi looso ikkinota xawisinohu kalaa Selemooni; dagate eeggo fulatenna dagate hasatto mootimmate shiqishatenni ammanante owaattarano sokkasi sayisino.
Gobbanke lophote doogo aana noota huwattino gobbayidi gobbuwa,Itophiyu ninkera gulupha gibbanno yite huluullante cancishaanchu HWHT hidhitenna guluffe Itophiya ciiggishshara wo’naaltanni noota Sidaamu daga wo’munni wo’ma huwatte Miinjjunnino ikko mannu wolqanni mittimma halante diina gaaddino garino baxxinohunni naaxxisiisannoho yino.
Jeefoteno haaro sommanni mootimma dagte xa’monna halcho wonshate loossannota buuxise; deerru deerrunni daga riqimboommo baali Itophiyu keeriranna jireenyira lipheessahono di gede’nineemmo yino.
Bakkalcho Wocawaaro 20, 2014
