Addisu Adoola
Addis Ababa: Addis Ababu Quchumi Wocawaaro 18/2014 M.D safino haaro mootimmanni Dukko Adaanechi Abeebeta quchumu kantiiwa asse wo’ma huuronni mootoonsino.
Dooramaancho kantiiwa Dukko Adaanechi Abeebetino barraho assitino hasaawinni, Itoophiyu ayimmate woganni, dhaggetenna budu duuchimmanni wo’mitino hundi batinye maala’lissannonna naaxxissanno dhagge noose jawa gobbaati. Addis Ababinkeno baalunku Itoophiyu qansichi mereersha, hee’neemmonna dancha minenkeeti yite; dagasenni duuchimmatenni mittimmatenni hee’rate tiro rosiissino; duuchimma mitiimma ikkitinokkita heedhe leellishshinonna ta”annokki Itoophiyu jireenyinni usurantinota ikkitino gede xawissino.
Dukko Adaanechi, Itoophiyimma mundeetenninna miqichunni batinye ilama kakkalonni ijaartino kaajjadonna shotu garinni hoshooshantannokkinna diigantannokki gobbanna daga meessi horonni aleenni gobba baxate xawishshaatino yitino. Wole ragaanni banxeemmosenna illenke diikkichi gede qorophineemmoseti gobbanke Itoophiyu lowo jiro ama ikkiturono sannate giddooyidinna gobbaydi xiiwo korkaatinni noose jiro horonsidhukkinni buximate giddo keeshshase xawohono yitino.
Dukko Adaanechi, gobbanke Itoophiyu mitto ragaanni ilamatenni ilama sa’ino demokiraasete xa’mo kuusantinowa wole widoonni tenne xa’mo qolate assinanni kaajjado sharro baxxite egentinosekkinna hakko deerrinnino batinye soorrote halcho, wo’naalshubbanna hattonno sharro gufidhinose gobba amande sannate keeshshinoommo yitino.
Konneno kaimunni soorrate dandiissiisanno garinni sai sasu dirinni hanafe dagate xiiwonninna soorrote wolqubba goshoonshenninna massagonni sannate soorrote halcho sharro wo’mitanno gufowa reekkama hananfoommo. Techo harinsanni hee’noommo mootimma safate songo soorrote gumi xawishsha ikkasi, batinyimmate hedo, mannihimittenna demokiraasaawe qoosso ayirra, duucha miidiyuubba hala’la, dagate beeqqo kaajja, ubbino dagoomitte balchoommanke dawadha, halaalanyu Federaalete amuraati loosu aana hosa, mallaande hanqafaanchimmatenni riqiwamanna labbannori Itoophiyu ka”anna jireenya leellishanno akati aana hee’ne sanfeemmo mootimma ikkitinohura baxxitinonna dhaggennita assannose gede coydhino.
Ledoteno quchuminke daga huuro aate harinshonsa lame tiro noosete yitinoti Dukko Adaanechi Abeebeti; umihu daganke batinye higginosekki xa’monna tidhaminosekki qarri hee’riserono soorrote hanafo qaafubbanni hexxo assasenna paartenke taysiissanno hedubbanni hexxo assi’rase leellishshinote. Layinkihu, jireenyaho huuro uytinoti rooriidi anga ikkiturono wole hettisamaano paartubbara huuro uytino qansooti huuro gamba assine la’nanni woyte shota tiro uynannita ikkitinokki gede huwantoommo; tini huuro barcimunnino riqiwama hooggurono ayirrisantara hasiissanno yitino.
Dooramaancho paarte jireenyu kawi ka’inni noo hasattubba mamootinnino aleenni macciishshatenni demokiraasete ijaarshira hettisamaano politiku paartubba hanqafatenni dagate hasattora shiqqino mootimmate massago kalaqa xa’manno. Konneno paartenke seekkite huwattanno yite; konnirano dandiissiisanno akati uurrinshaamo ijaarshanna dagoomu beeqqo assoote diriirsatenni Addis Ababa haaru politiki budinninna haaru gafinni ha’ranno gede assate yawonke fulleemmo gede buuxisiisamma’nera baxeemma yitino.
Xaphoomuni kuni doorshi kaimi, harinshonna gumi, Itoophiyaaho saeno Afirikaho demokiraasete ijaarshira, gobbankeranna quchuminkera jireenyanna dancha kaayya haa’re dayno. Konni daafira haaru Addis Ababu Quchumu Gashshooti Amaale Mini teessaanote soorrammetenna latate hasattubba badatenni hasiissanno dawaro qolatenni qodhe ka”asi buuxisanno yitino.
Jeefoteno kantiiwitte ammantinenke huuro’ne uytinke quchuminke teessaano mayinnino aleenni roorrootinke ki’neeti. Ninkeno qaalenke agadhine ammano’ne xeinsummokkinni heeshshi yine owaantammo’nera qixxaamboommo; aleenni xawinsummo yawo baala wo’munna ikkadu garinni fulleemmo gede irko’ne baxxitannonkekki gede lowo ayirrinyinni xa’mireemma yitino.
Bakkalcho Wocawaaro 20, 2014
