Tenne yannanni batinye maate mitii’mitanno hajo ooso woy qaaqquullu Bilbila, Taabileete woy Kompiwutere amadde keeshshate. Ooso hincilaallo (screen) la’anno yanna bikka lowo geeshsha hasiissanno. Kunino gobba godo’litanno gede, millimmo assitanno gede, dancha goxicho afidhanno gedenna wolootu ledo dancha xaadooshshe kalaqidhanno gede dandiisannonsa. Wolu qaru coy kayinni illete fayyimma agadhate kaa’lanno.
Hincilaallote caabbichi ille hiittoonni gawajjanno?
Lowo maate angate bilbilinna woloota hincilaallo (Iskriine) seeda yannara la’’a gawajjitannota xa’mitanna macciishshinanni. Konni woroonni mito mito agarrannihanna masisanno guma la’neemmo.
1. Duucha woyte mini giddo keeshshanna xeertote nooricho la’’a hoogate qarra (short sightedness):- Umi qarri hincilaaallo duucha woyte horonsira ooso mini giddo keeshshitanno gede assitannonsa. Addi addi xiinxallo leellishshanno garinni arrishshote caabbichi illete fayyimmara hasiisannoho. Konni daafira ooso gobba godo’litanno gede assa mannimmate lophonsanni gobbaanni illensa fayyimmara luphiima qeecha afidhino. Hattono ooso mini giddo seeda yanna keeshshitanno woyte xeertote nooricho la’’a hoogate qarrira (short sightedness) aamantanno. Korkaatuno garunni afa hoongirono addi addi hedo heedhanno. Xiinxallaano arrishshote caange giddo noohu ‘’Yuvi’’ yinanni caabbichi fayyo ille lophora hasiisannoha ikkasi xawissino. Amadaminohunni sa’u 30 dirrara xeertote nooricho la’’a hoogate qarri oosote aana lowo geeshsha lexxinota la’noonni.
2. Illete daafura:- illenke fooliishsho hasidhanno. Ooso kayinni mittoricho amadduro rakke agurtannokki daafira seeda yanna mittu coy aana keeshshitara dandiitanno. Illacha hasi’ranno coy baxxinohunni hincilaallotenni fulanno caabbichi ille roorenkanni daafursanno.
3. Illete moolanna rifata:- seeda yanna hincilaallote (screen) aana keeshsha illete moollenna rifata abbitanno. Xiinxallo xawissanno garinni hiikkunni diru deerri giddo noo mannooti hincilaallote aana keeshshituro illachinsa adhamanno daafira illensa di-dibbanno. Kunino illete moolle abbanno. Kuni qarri qaqquullu aana ikkiro bati’ranno. Korkaatuno; jajjabbu illera yine loonsanni hincilaallo (screen) horonsidhanno daafira.
4. Goxanote aana kalaqanno qarra:- goxanote yanna moora wolu qaaqquullu aana kalaqanno qarraati. Xiinxallo leellishshanno garinni Bilbilu, Taabileetete, Kompiwuteretenna wolootu hincilaallote uduunnichinni fultannoti kuulaame caange baxxinohunni hashsha hashsha horonsi’ra surrete goxano amanyoote soorritanno. kuni hincilaallote caabbicho surrenke barri gede assite adhitanno daafira mannimma goxanote yanna soorritanno. Ledoteno godo’le quqquxxannonsa daafira qaaqquullu goxano agurte yannansa bilbilu giddo noo godo’lera uytanno.
Maa assa hasiissanno?
• Hincilaallo (screen) horonsidhanno yanna bikka
• Ooso mixotenni massagantannota buuxa
• Ooso gobba godo’litanno gede jawaachisha
• Bilbila woy Taabileete horonsi’ra dandiitannokki base bada
• Baxxinohunni goxanote albaanni gonxanni mine bilbila horonsidhannokki gede hoola
• Maate oosonsara lawishsha ikka hasiissannonsa; insano ikkituro bilbila horonsidhanno yanna bikka hasiissannonsa.
Bue: xagisaanote FB qoolinni
Bakkalcho Wocawaaro 13, 2014 M.D Hamuse
