Irreechu ayyaani Oromote dagara galatunna huuccattote ayyaana ikkinota Oromote Qoqqowi Budunna Turizimete Biiro egensiissu.
Biirote sooreessi kalaa Kabbadi Deesiisihu xawisino garinni; Irreechu ayyaani keerunniha, baxillunniha hattono mittimmanniha ikkinota kule; Oromote daga ayyaanu barra Kaaliqa woy Waaqa galattannohonna huuccidhanno barraati ikkinnina Irreechu ayyaani poletiku heewora ayirrinsanniha di-ikkino yino.
Irreechu ayyaani Itophiyu daga baxxinohunni kuushi ga’re quqquxante agadhite noo ayyaana ikkasinni ayyaanu barra Itophiyu daga baxxino garinni ayirrissara qixxaabbe nootano xawisino.
Gumi Belel 12ki doycho harissino hasaawu bare aana “Irreechu mayimma, Irreffaanni dhaggete harinsho be’ronni techo geeshsha” yaanno uminni sa`u Qidaame barra Oromiyu Pirezidaantichi Borro mine paanaalete hasaawa assinoonni.
Ba’reteno Irreechu ayyaani keerunniha, baxillunniha hattono mittimma leellishannoho ikkinninna poletiku hasattoranna heewora assinanni ayyaana ikkinokkita xawinsoonni.
Ayyaanu hawadonna addi addi korkaatinni xeertidhe noo Oromote dagano ikko Itophiyu daga hagiirrunninna baxillunni xaadisanno ayaana ikkinota xawisinohu biirote sooreessi Kalaa Kabbadi; ayyaana woffi assitara, wolewa qolte wirtara hasidhanno wolqa poletiku widira soorrite 2009M.Dra haammata keeraano Itophiyu qansooti aana jawa gawajjo iillishshinota qaagiissino.
Barraho paanaalete hasaawira ba’rera leeltinori Abbaa-Gadootunna Haadhe- Sinqootu Irreechu ayyaani, Oromote daga baalanka coye iimanna uulla kalaqino Kaaliqira hattono lagganna garba, barranna hashsha, heeshshonna reyo, hawadonna arro, saadanna manna kalaqinohuranna duuchanka assa dandaannohura (Waaqa) woy Maganoho galatanna ayirrinye shiqishshanno ayyaana ikkinota coyidhino.
Oromote daga Irreechu ayyaannira, eltonna atoote, keerenna hagiirre, fayyimmanna diro, baxillenna ayirrinye, xawaabbanna hexxo, mitte wogganni wole wogga widira dirunni diro sayisinonsa Kaaliiqira woy Waaqira galata shiqishshanno. Irreechu Keeru ayyaanaati. Kuni ayyaani Kalaqamunna Manchu beeti mereero noo elto, mimmitu ledo gatona yaate amuraate assine Oromote dagara hattono Itophiyu daga baalate keeru, baxillu, fayyimma, jireenyu ayyaana ikkanno gede Waaqa woy Kaaliiqa huuccidhano barraati.
Ayyaana ayirrinsanni woyteno beeqqaano baalanti koronu fayya taraawo gargadhitanninna qorophatenni ayirrissanno gede sokka sayinsoonni.
Tayxeha 2014M.Diri Irreechu ayyaana baxxino garinni ayirrinsanni yine hendanni. Irreechu ayyaana Wocawaaro 22ni Addis Ababaho; 23nni Biishooftu Hora ayirrinsanni gede Oromote Abba-Gadootunna Oromote Qoqqowi Budunna Turizimete Biiro egensiissino.
Abrahaam Saamueel
Bakkalcho Wocawaaro 13, 2014 M.D Hamuse
