Amaaru qoqqowi giddo Daabaati Woradira Cina yinanni quchumira Cancishaanchu HWHT fanino olinni mittu mini maate miilla ikkitinore 6 manna shine mitte balera waammoonni. Haammatu reeshshi gateenni bushsha uddi`re leellanno. Konni korkaatinni qooxeessu manni yaaddote giddo hee`rinkunni keeshshino.
Dukko Baanchialem Qeesibiddireti, Cina keeraano qansooti aana iilinshoonni hilonni xaa geeshsha hallu taeenna noote. “Anino hedeweelcho gatoommate” yitanno; rodoo`yanna qaaqqi`ya reyno; qooxeessu baalu reeshshunni wo`mino yitanni illesenni hindiiddo lolaassanni kultanno.
Bayi’ra rodoo`ya danqu qaaqqise ledo Cancishaanote qodhaano xiyyiite raafata fante shitu; hakkuno di-ikkinonke yite dagge gattukka yite qaaqqoseno shitu. Konne barshenna hilo buqqee noohu di-assanno. Insa gotoho; diinaho; togoo loosi Sheexaanu loosooti yitanno. Konnira, xaa geeshsha yaaddotenni noota hururante wi`litanni ku`litanno.
Mannu goofo gedensaanni ninke gantoommori addintanni yaaddotenni hiiqqammoommo; korkaatunno maatenke yaano, anni`yanna lamu wosiilla`ya hiikka higginoro di-afoomma yitanno Banchialem. Lubbantinorinni roorenkanni fugante noo mannooti heeshsho teessaano kaajjado yaaddo aana tuggino yite kalaqaminoricho kultanno.
Geercho Seggedi Tasammitino hattonni 6 oosose mereerinni mittu beettise Cinu daga raafatunni shini yannara bainoe yitanni xaa geeshsha hiikko nooro di-afoomma yitanni coydhanno.
Cancishaanote qodhaano isera loose itisannoseha mitto qaaqqose fugge adhite hadho woy boonoho tugge hadho di-afoomma yitanno.
Amma`note minna massagaanoranna afoonsa dadhitinokki qaaqqulle marartinokkiri cancishaanote qodhaano, keeraano manna doddolte shitino; ollaa baala diiggino; jajju mittuno dino yittinoti dukko Seggede; Gargartote olanto dagge diina gama shite gatinoha qafada hooggeemmero kawiinni roortino reyonna doddolama heedhannonkanni yitino. Xooqqe dubbo e`ino mannootino xa tenne yannara fule daanni nooha ikkiro nafa kiirotenni lowo manni di-higino. Ane qaaqqino xaa geeshsha bae no. Cancishaanchu HWHT geedhima`ya yannara loose itisannoeha qaaqqo`ya abbalte wodana`ya madiissitinoe. Cancishaano gaamo Daabaati Woradira Cinu qooxeessira Woxawaaje aganira 2013M.Diro keeshshi yanna baalate daga shitino; dhaggete Donna horrino yinohu Cinu Giyorgisi amma`note mini sabaku sooreessi Qeesi Aberri Deemasiho.
Cancishaanote gaamo haammata amma`note massagaano qeesootano shitino. Konne calla ikkikkinni, sase kg birru masqala, sase kg culqu masqalanna sase kg camote masqala hattono seeda diro kiirsiisinoha Biraannu maxaafanna addi addi maxaaffa amma`note mininni horrino.
Xaano kumu ale kiirranni saadanna lukkuwa gorre itatenni sae qawwe tokkose shinoti mageeshshi geeshsha bushanna diina ikkinota leellishannoho.
Malawo malanbanni diishshote koshsha xaphoomunni 115 ikkannoha buluushshe agurinotano Qeesi Aberri kulanno. Daga gargartote olanto ledo halante kawiinni huna hooggeemmero roorinoricho assanno.
Juntu gaamo Cinu olliira iillishshino hilonni 200 xibbi ali manni goofinotanna 100 ale ikkanno mannino hiikkira bainoro horontanni di-anfoommo yino. Konnira, qarru mageeshshi geeshsha ayirrinoha ikkinota xaa geeshsha daga yaaddote giddo noota olluu teesaano kultanno.
Abrahaam Saamueel
Bakkalcho Wocawaaro 13, 2014 M.D Hamuse
