Addis Ababa:- Albankeenni ayirrinsanniha Masqalu ayyaana iibbino garinni ayirrisate qixxaawo gumulloonnita Itophiyu Ortodoksete amma’no mini egensiisi.
Itophiyu Ortodoksete amma’no mini albiidinke Sanyo Wocawaaro 17/2014M. Dnni ayirrinsanni Masqalu ayyaanira wo’manta Itophiyu dagara hawalle iillishino’ne yitanno sokkano saysino.
Amma’note mini xaphoomu soqqansho layinkihu loosu harisaanchi Qesiis Belay Mekonninihu; ammanaano Masqalu Damaru ayyaana ayirrissanno yannara Koovid-19te fayyanni agaramatenni ayirrisa hasiissannonsata huwachishino.
Masqalu Damaru ayyaani rosaminowiinni babbaxxino korkaatinni ayirrisamanno yinohu Qesiis Belayi; sai diro Koroonu fayya korkaatinni Masqalu Gudumaalira kiirotenni shiimu manni callu afaminowa ayyaana ayirrinse sa’noonnita qaagiissino.
Xa kayinni Koroonu xisso hedote giddo woratenninna qoropho assatenni dagoomu dargaho afame iibbino garinni ayirrisannoha ikkanno yino.
Woluno xaa yannara Masqelu Gudumaale gatamarshi gumulameenna biifado basera ayirrinseemmo gede injeessinoonniha ikkasi baxxinoha assannosi yinohu Qesiis Belayi; konnirano mootimma galatino.
Masqalu Damaru ayyaani kalqete angate amammandannikki donna mereerinni mitto ikkasi kayse; ayyaana wo’munku qooxeessira ayirrinsanni woyte keerunni, baxillunninna wole irkisatenni ayirrisa hasiissanno yaanni sokkasi saysino.
Qiddist Gezaheny
Bakkalcho Wocawaaro 13, 2014 M.D Hamuse
