Addis Ababa:– Haaru rosu amanyooti 2014M.Dnni 11 kifilera baalante qoqqowubbaranna rosu minnara wo’munni wo’ma gumulamannota Rosu Ministere xawissu.
Rosu Ministere rosu amanyooti qixxaawonna xiinxallo Jeneraal Dayirekter Dokter Tewodroos Shewareggexihu baxxinohunni Itophiyu Pireesete Uurrinshara xawisino garinni; haaru rosu amanyooti 2014M.Dnni 11 kifilera baalante qoqqowubbaranna rosu minnara wo’munni wo’ma gumulamanno. Hattono 1-7 nna 9-10 kifile geeshsha doorantino rosu minnara wo’naalsha hananfanni.
Haaro rosu amanyoote gumulsate ikkado qixxaawo assinanni hee’noonnita xawisinohu Dr Tewodroosi; balaxote rosinni 8ki kifile geeshsha rosiinsanni maxaaffa qixxeessa qoqqowubbate yawo ikkasenni qoqqowubbate widoonni qixxaawo assinoonnita coyi’rino.
9-12ki kifile geeshsha noo qixxaawo Rosu Ministere widoonni Onte fullankete mereershuwa Yuniversituwanni mitte ikkitino Hawaasi Yuniversite qineessonni qixxaawanno gede assinoonnita xawise; haaru rosu amanyooti gumulo aana roosiisaanote qajeelsha uyinannita egensiisino.
Dr Tewodroos Shewareggexi xawishshi garinni; haaro rosunna qajeelshu poolise 2015M.Dnni wo’munni wo’ma gobbate duuchunku qooxeessuwara afantanno rosu minnara gumulantanno. Kunino 1986M. Dnni kalanqeenna 28 dirrara owaattanni keeshshitinota rosunna qajeelshu poolise riqibbannota ikkitanno.
Konni alba nooti rosunna qajeelshu poolise rosu isilanchimmanna iillo woyyeessate widoonni lowo xeertinye hadhinota ikkiturono rosu islanchimma aana qarru noota xiinxallotenni bandoonni yinohu Dr Tewodroosi; konne qarra tirate haaro rosunna qajeelsu poolise kalanqanni gede assinoonnitanna pooliseno gumulsate seeru hasiisanno daafira haaru amanyooti hedo garinni xaphooma rosu lallawa qixxeessine kaabinete shiqinshoonni yino.
Haaro rosunna qajeelshu poolisenni addi addi soorronna woyyaambe assine qixxeessinoonnita ikkase xawise; assinoonni soorronna woyyaambe islanchimmate irko assitannore ikkansa qummi assino.
1986M.D rosunna qajeelshu poolise kalaqamu egenno amada hoogase, laalchunna loosu ledo amadantinota ikka hoogase, tekinoloojetenni irkisamate hayyo lowo geeshsha ajjinota ikkitinota xiinxallotenni bandoonnita kayse; haaro qajeelshunna rosu poolise kuri qarrubba tirtannote yino.
Dr Tewodroosi Shewaareggexihu coyi’rino garinni; haaru rosu amanyooti haa’re daynohu wolu jawu coy amanyootu rosooti. Qansootu amanyootunni keeraa’mitanni hadhuro xa la’neemmo qarrubba diheedhanno. Kunino haaru amanyooti hasaawi aana ka’’asinni amanyootu roso kalanqanni gede assinoonni. Konnira amanyootu roso umi dirimira 1-6ki kifile geeshsha aate qixxaawo assinoonni.
Haaru rosu amanyootinni gobboomu illacha hasidhanno hajubba doogote keeraanchimma, hodhishsha, qooxeessu agarooshshenna koo-tee mittu rosu dani gede ikkikkinni rosu ledo karsine uynanni gede assinannita qummi assinohu Dr Tewodroosi; hajo la’annonsari loosu minna ledo halamme rosu amanyooti qixxaawote looso loonsonnita xawisino.
Haaru rosu amanyooti qixxaawo seeda yanna adhine qixxeessinoonniha ikkasi xawisinohu Dr Tewodroosi; gumulamanno woyteno Rosu Ministere yawo calla ikkikkinni baalunku qansootiha ikkasinni wo’munku qansooti qorophotenni yawonsa fultanno gede xa’mino.
Qiddist Gezaheny
Bakkalcho Wocawaaro 13, 2014 M.D Hamuse
