Addis Ababa:- Gobboomitte mashalaqqetenna keeraanchimmate owaante 2013M.Dra gobbate mittimmanna wolambinatu aana magadantino keeraanchimmate yaaddo balaxe hunate widoonni gumaamo looso gumultinota xawissino.
Gobboomitte mashalaqqetenna keeraanchimmate owaante 2013M.D loosu yannara jeefote mixote gumulshi aana kaajjado qora assatenninna 2014M.D loosu yanna mixo tittirshu assootubba widoonni hasaawatenni aantete ragubba worino.
Gobboomitte mashalaqqenna keeraanchimmate owaante Dayrekiterchi Jeneraal Temesgen Xirunehu hasaawu yannara xawisino garinni; sai baajeetete dirira gobboomu mittimma diigate illacha assitino yaaddo gatisate ragaanni owaante gumaamma loossa gumultino.
Owaantete loosi mini baxxinohunni 6ki gobboomu doorshi keeraanchimmasi agarantinoha ikkanno gede assatenni doorshu albaanni, doorshu barranna doorshu gedensaanni harinsho keeraanchonna gumaame ikkite jeeffanno gede federaaletenna qoqqowu keeraanchimmatenna ga`labbote bissa ledo qinaawe loosatenni qeechasi fulateno aleenni 2ki doycho bayi’riidi Itophiyu haroo`mate kofattora waa wonshate harinsho mitiimma nookkiha jeeffanno gede tungoonnisita uurrinshimmate yawo fulatenni jawa qeecha fulinota kalaa Temesgeni xawisino.
Ledoteno Tigrayete qoqqowira harinsonni seera agarsiisate gaado hattono xaa yannara Aliyye gobbate qooxeessira harinsanni hee`noonni wolambinatu gaadi ledo amadisiisaminohunni hasiissanno mashalaqqete sokko gumulatenninna massagaano aatenni magadaminoha gobboomitte keeraanchimma yaaddo gatisate widoonnino sokkosi fulino yino Dayrekiter Jeneraalichu.
Owaantete loosi mini gumulate wolqa lossate sai dirira baxxinohunni mannu wolqa qajeelshunni, tekinoloojetenni, loojistiksetenni, injiino loosu qooxeessa kalaqate widoonni haammata looso illacha tuge loosanni keeshshinota qummi assinohu kalaa Temesgeeni; giddoyidinna gobbayidi cancishaano gargadhatenni, seeri-weelo olu uduunnenna seeriweelo doogonni woxe basetenni base saysate assoote gargadhate ragaannino gumaamma qorqorshu loossa harinsoonnita xawisino.
Aanteteno uurrinshate gumulsha woyyeessitannonna aantaancho dhuka lossitanno loossa gumullannita amadisiise coyyi’rino.
Owaantete loosi mini 2014 baajeetete diri mixosino gobbate keeraanchimmanna mittimma agarsiisate HWHT lede cancishaanote aana adha hananfoonni qinaabbino qaafo ledo amadisiisaminohunni uurrinshimmate sokko fulate assoote kaajjishe sufannota buuxisinohu kalaa Temesgeeni; aantete gumulamanno 3ki doycho haaroo`mate kofattora waa wonshate harinsho danchu garinni jeeffanno gede hattono woloota gobboomitte keeraanchimma yaaddo gatisate la’annonsa bissa ledo qinaawe loosasi kaajjishannotano egensiisino.
2014 baajeetete diro kalqoomu, gobboomu, qooxeessunna gobbate keeraanchimmate yaaddo tittiratenni gobboomitte keeraanchimma buuxisiisanno kaajjado yannaasincho uurrinsha assate hananfoonnire batinye soorrote loossa kaajjishe sufanno gede xawisinotano owaante Itophiyu pireesete uurrinshara sokkino tajenni egensiissino.
Abebech Maatewoos
Bakkalcho Wocawaaro 13, 2014 M.D Hamuse
