Kaa`lote ikkanno gide hogobbe Tigirayete qoqqowira hadhinori 466 hogowu kaameella giddonni 428 kaameella qoqqowunni wirro higa hooga kaa`lote gide shiqishate jawa qarra kalaqqinota Gobboomu Danote Bidhatto Massagote Komishiine Komishiinerichi Kalaa Mitikku Kaasihu xawisino.
Kalqete dagoomi Konne busha assoote hayi yaa hooga qarru lexxanni ha`ranno gede assinotano kulino.
Komishiinerichu mitte gobbate giddo miidiyi ledo assino keeshshonni, hallanyunnire ikkinorenna gobbate miinji aana jawu qeechi noonsari 428 kaameella kaa`lote gide hogobbe Tigirayete Qoqqowira hadhinowa hakko gatansa gawajjo kalaqqinota huwachishino.
Ledeno, kaameella higa hoogate korkaati laambu nookki daafiraati yite coydhinori Cancishaanchu gaamo korkaati kaphoho yee; konnirano ikkado laamba qoqqowoho sonkoommo yino.
Tigirayete qoqqowinni fulte dagginokki kaameella rahotenni wirro higge kaa`lote gidenna uduunne hogobbe massa noonsa yinohu Komishiinerichu; Tigrayete qoqqowira kalaqantanno hudera Federaalete Mootimma xa`mantannokkita kulino.
Kalaa Mitikku amadisiiseno Halantino Mootimma Uurrinsha kaameella Tigrayete Qoqqowinni wirro di-higgino yaa calla ikkikkinni, kaameellate annuwino eo afidhannohu tenne kaameellawiinni ikkino daafira Cancishaano gaamo aana xiiwo asse kaameella qoqqowunni fultanno gedenna kaameella kaa`lote uduunne shiqishshanno gede injeessa hasiissannonsata huwachishino.
Tigrayete Qoqqowira kaa`lo haadhe hadhino 466 kaameella giddo 428 ikkitanno kaameella HWHT qoqqowunni fultannokki gede asse noo yannara Halantino Mootimma Uurrinsha Itophiyu Mootimma Tigirayete dagara kaa`lo assa gibbino yaate tiiu dinonsa yino.
Abrahaam Saamueel
Bakkalcho Wocawaaro 13, 2014 M.D Hamuse
