Ameeriku prezidaantichi Jo Baydeni malaatisino agawo woyyaanete horo beeqqaancho ikkitinotenni Suuzaani Raysinni borreessantino borrooti yaanni Itophiyu sooshaale dimokraatike paarte pirezidaantenna poolisete xiinxallo instituute aantanchu qara dayrekitere profeeser Beyyene Pheexiroosihu xawisi.
Profeeser Beyyene Pheexiroosihu Itophiyu pireesete uurrinshara xawisino garinni; Ameeriku Itophiyu aana harissanni noohu hasiisannokki garinni giddo hajora angase worate. Ameeriku Itophiyu giddo nooha halaale huwata dandiitinokkihu Baydeni gashshooti woyyaanete luphiima baxilli noonsari Suuzaan Raysinna labbannosirinni huxxaminoha ikkasinniiti. Ikkinohurano kaphu duduwinni isoneete dimbisinohura hiikko daniti gara mashalaqqe iillitusirono higannokkiho yino.
Profeeser Beyyene xawishshi garinni ikkiro, Ameeriku Itophiyu aana ikkado taje heedhannose woyte uurrinshase biddi assidhanno yee hedeemmonkanni. Ikkollana Diyaasporunna babbaxxitino seenaaterenni Itophiyu daafira gara ikkitino mashalaqqe halaalaancho iillitanninsa nooha ikkirono assootinsa kayinni afanni goxinoha banqono dibaragissanno yinanni coy gede ikkino.
Ameeriku xa leellishshanni noohu Itophiyaho giddo hajora angase woratenna agawo Itophiyunni Ameeriku widira du`nantanno horo dino yitanno boo’naati. Itophiyunniti giddoydi hajo umise hajo ikkinnina Ameeriku mitiimma di-ikkitino. Ameeriku taalleenya harunsitanno gobba ikkiteemmero cancishaano gaamo Tigrayete qoqqowinni sa’e Aliyye Gonderera, Aliyye Wollo Waagihimirahonna Affaarete qoqqowira assitannoha bunshetenna kakkachimmate qacce efidhe giwa dandiitannonkanni yaatenni xawisino.
Cancishaano gaamo loossino kaadate loosi Ameerikaho mitte isteete giddo kalaqameemmero Ameeriku adhitara dandiitanno qaafo maa ikkinoro anfanna xaa yannara cancishaano gaamo ledo yekkeeramme yaa kayinni gobba diigate hasattose leellishinoho yino.
Ameeriku boo`natenni gobbuwate gaance kalaqantanno woyte mannimmate qoossonna labbanno hajonni gobbuwa mitiinsa, keere hunanna diiga xawishshaseeti yinohu profeeserchu; konne halaale huwate meessaneete miinjunni woyyeessatenna lophate qixxaawa mittu mittunku Itophiyu qansinchiwiinni agarranniha ikkasi buuxisino.
Joo Baydeni malaatisino agawo Suuzaan Raysiti cancishaano gaamo irkisate borreessitino borrooti. Kunni ledoteno Ameeriku mootimmanni maciishshantanno CNN, Reuters, Washington Post labbino tuqu xaadooshshuwa baalanti Itophiyu su’ma bunshetenni kayissanni kaphunni dudubbanno gede qaxarantinoreeti. Kunino ikkinohu 27 diri giddo mulqinoonni Itophiyu jironniiti yaanni xawisino.
Ameeriku cancishaanchoho yinoonni gaamo mootimmate ledo yekkeeramme yaase may shallagonni ikkinoro xawo dikkino yinohu profeeserchu; amadino doogo Itophiyu aana xiiwo assatenni cancishaancho gaamo billoonyu widira abba ikkinota anfe tenne Ameeriku uurrinsha qeelate dippilomaasetennino ikko wole doogonni kaajje loosa hasiissanno yino.
Abebech Maatewoos
Bakkalcho Wocawaaro 13, 2014 M.D Hamuse
