Addis Ababa:- Sai diri goofimarchira gobbanke dhaggenni 6ki yannara harinsoonnihu gobboomunna qoqqowu doorshinni daga doodhitino paarte safidhannoti haaro mootimma Sidaamu dagara ikko gobbanke daga wo’mantera jawa kaayyo haadhe daggannote yaanni Sidaamu dagomu qoqqowi pirezidaantichi kalaa Desta Ledamohu xawisi.
Tini hee’noommo yanna Itophiyaho ikko qoqqowinke dagara baxxitino dhagge afidhinote. Kunino dimokiraasaawe ikkino garinni daga qaccetenni qaccete geeshsha umisenni fulte umise huuronni gashshannoseha doodhitino yanna ikkasenni gobbankera Konni garinni doorantino paarteno gobbate deerrinni Wocawaaro 24/2014M. Dni hattono Sidaamu mootimma kayinni Wocawaaro 20/2014M.Dra haaro mootimma safidhannohura hala’lado balaxote qixxaawo assinoonnita egensiisino pirezidaantichu.
Saiha 6 diro mootimma safatenni dhagge loosino amaale mini riqiwamaano ayirrinyunni geegiissatenna haaro safantanno mootimma, aananno ontu dirira qoqqowo gashshitannoha ikkanna tenne yanna giddono daganketa miinju, poletiku, dagoomittenna dimokiraasete, danchu gashshootinna ga’labbote xa’mora garunni dawaro qolatenna gummaamo ikkino garinni jeefisatenni qoqqowono ikko gobbanke jireenyaho reekkate hixamanyine loonsanni yino.
Haaro safi’nanni mootimmanni dagate halcho wo’miteenna buximatenni fulte, dancha gashshootenna hasiisanno horono afidhe kassi yitanno yanna ikkitanno yine hendeemmo yino pirezidaantichu kalaa Desta.
Konne assa dandaateno haaro mootimma amaale mine jawaata massagaano shiqqannoha ikkanna deerru deerrunkunni hee’noommori baalunku daganke waateho uurrisi’ratenni hasattonsa kassi assate baalunku gobba galle waaga baante loonseemmo yee hedeemmo yaanniiti xawisinohu.
Sai gashshootinni gobbanke daga lowontanni miicantenna kadote gashshooti giddo keeshshitu gedensaanni hala’lado dagate sharronni kakkachu gashshooti uwanno gede assineenna soorrote yannara hee’noommohano ikkiro; xaano mootimmate massagaano giddono ikko daganke giddo maaxante juntu qallawannasa hunote gaamo assoote irkissannorinna babbaxxitino dagoomitte mashalaqqete qoolinni soorrote mootimma xontannorinna dagatenna gobbate ayirrinye diinaho sayisse aate wo’naaltanno wolquwa nootano pirezidaantichu lede egensiisino.
Ama reyituro godowihu mullanka reyaannona yinanninte gede juntu wolqa gananturo kuri giddoonni surtanni hunote sokko adhite millissanno wolquwano ba’’ansa gattannokkihura mootimmanna dagano konni ragaanni kaajjite loossanni afantannotano qummi assino.
Pirezidaantichu kalaa Desta amadisiiseno albankeenni ayirrinsannihu Masqalu ayyaani Mootichinke Yesuusu Kiristoosi ninke cubbo Isi adhe sutame ninkera gato uyinonke ikkitooti. Gobbankera ayirrinsannihu Masqalu ayyaanino waaga baantihu afamino barra ikkasinni; bayi’ra ayyaana assineeti ayirrinsannihu; mitootaho haaro dirono sa’’ate ayyaanaati; konne ikkinohurano Masqalu ayyaana Masqalu suttammee ledo ayirrissinannireno hawalle iillishino’ne; dancha ayyaana ikko’ne yaanni amma’no’ne giddoydo haaroo’mitannoha, Masqalu anni kaaliiqi dhagge ledo xaadooshshe kalaqqinannihanna mimmitu ledono baxillu bati’rannoha ikko’ne yino. Xaphoomunnino ayyaanu dancha heeshshonna halcho’ne wo’mitannoha ikko’ne yaa baxeemmo yino pirezidaantichu.
Ayyaana ayirrinseemmo woyteno gobbankera Juntu kalaqino mitiimma gargarate waaga baattanni noori ga’labbote wolquwankera irkonna ayirrinye leellishatenni, hoogginorirano kaa’linanni sayinsatenni Kaaliiqi hajajo guuta assa hasiissannonke yaanni sokkasi saysino.
Amsaalu Felleqe
Bakkalcho Wocawaaro 13, 2014 M.D Hamuse
