Sidaamu Qoqqowu Dagoomu Fayyimmate Inistituute Qara Dayrektere
Addis Ababa:- 3ki dambala yinanni haaru koroonu sirchi ledo amadisiisame lowo mitiimma kalaqantara dandiitannota qoqqowu dagoomu fayyimmate inistituute qara dayrekterchi Dr. Maatte Mangashihu xawisi. Koroonu babbaxxitino basera hee`rara dandaannohura reqecci yiino garinni millinsanniha ikkiro taraawo lexxitanni hadhanno yiinohu Dr. Maatte dikkote; rosu minnara, amma`note uurrinshuwara, hodhishshu giddo hattono babbaxxitino loosu basera daga kaajjado qoropho assa hasiissannonsata egensiisino.
Dr. Maatte baxxinohunni Itophiyu pireesete uurrinshara xawisino garinni, sa`u lamala geeshsha xaphooma 168 kume 7 xibbenna 94 ikkanno manna buuxo assinoonniha ikkanna 8 xibbi manni amadaminota, 179 manni tenne xisso korkaatinni lubbaminota hattono 2 manni quuxxote giddo nootanna 254 ikkanno manni harunsote basera, minenna fayyimmate owaante angara leeltannota xawisino.
Lamala lamalatenni amadamate kiironna rewo lexxitanni noota leellishshanno yiinohu dayrekterchu; xeertinye agadha hoongiro, maasike horonsi’ra hoongironna angate keeraanchimma garunni agadha hoongiro hiitte baserano reqecci yinannita ammannanni yiino.
“Koroonu dino ba“ino” yitanno hedonni deama digaraho yiinohu Dr. Maatte, albaanni saynsanni keeshshinoonni mashalaqqe garinni koroonu tenne kalqe aaninni ba“a geeshsha daga jawa qoropho assa hasiissannonsata xawisino. Amadisiiseno wole gobbuwara kalaqamino Delta Vayrese dambali ninkewano yannate gedensaanni daara dandaannota afa hasiissanno. Tennerano daga kaajjado qoropho assitanno gede sokka saynsanni keeshshinoonnita xawisinohu inistituutete dayrekterchi, 3ki dambala yinanni xissote akatino mannu rahotenni xissamannonna lubbamanno gede assara dandaanno yine hendanni yiino.
Dr. Maatte xawishshi gede ikkiro, xa noohu gargarooshshu bikka jawaataho yine diadhinanni; laafa ikkinota leellishanno. Tenne laaffinota woyyeessateno loonsoonniri baca ikkinoikkitanna mannuno mashalaqqe macciishshe gargadhate qixxaawa ikkinoikkita coyi`rinohu Dr. Maatte, baalunku illacha uyine gargadhate looso kaajjinshe sufa noonke yiino.
Ledoteno albilicho gashshootuno tenne sokko babbaxxino injonninna hayyonni horonsi`re dagoomaho iillanno gede assa hasiissannota qummi assinohu Dr. Maatte, rosu yannarano rosaano kunni albaanni fushshinoonnitanna haaro biddissi kiiro 803/2013 koroonu hajo lainohunni rosu minnara worroonni gadacha agaratenni qoropho assitanni rosonsa harunsitanno gede huwachishino
Abebech Maatewoos
Bakkalcho Wocawaaro 6, 2014 M.D Hamuse
