Addis Ababa:- Songaafichu kalaa Selemoon Laallehu 2014M.D haaro diro lainohunni saysino sokkanni haaru diri Sidaaminna Itophiyu daga Kaaliiqi 2014M.D haaru dirira iillishinonke yaanni halchosi xawisino.
Songaafichu baxxino garinni sayisino sokkannino, tayxe diro gobbate deerrinni hasi’noonnikki garinni Juntu gobbanke olaho eesseenna 2013M.D qarru giddo sa’noonni; konni olinni gobba gatisate olu basera noori gargarooshshu olantonke, qoqqowubbate addi wolquwanna deerru deerrunkunni nooti ga’labbote bissara hawalle Maganu qeelle uyino’ne; hawalleno haaru dirira iillishino’ne yaanni halchosi xawisino.
Tayxe dirinni gobboomunna qoqqowubbate deerrinni 6ki yannara harinsi doorshino sa’u yannara gobbankera harinsoonni doorshuwanni woyyinohanna dimokiraase noosi doorsha hattono dagatenni ammanamooshshe afi’rino garinni Itophiyu dagano latishsha, dancha gashshootenna jireenya hasidhannore ikkansanni gumulaminohona haaru dirinnino haaro mootimma sanfanni.
Konni kaiminnino doodhitino daga soorro hasidhannohura soorrote wolqanni massagantannota jireenyu paarte doodhitino yinohu songaafichu; daga hasidhanno soorrono latishshunna danchu gashshooti handaarranni horaameeyye ikkate; gobate deerrinni ikko qoqowubbate deerrinni mootimma uurrinseenna daga mootitte ikkasennino halaalaanchonna co’itte owaante afi’ra hasidhannohura aananno wocawaaro 24/2014M.Dra safantannoti haaro mootimmano daga agadhitanno sokkonna uyidhino eeggo fultannota ikkitanno yine agarrannita xawisino.
Gobbankera wo’mante daga sharronni soorro daggara albaanni noo gashshootinni bayi’riidi seerino agarama hoogatenni; dagate xa’mo garunni dawaro afi’ra hoogatenni; dagate jajji afimala gede amadamaannanna Juntu mannootino dagatenna gobbate jajjanna miinja uminsara horonsidhanninna mulqitanna wo’manti Itophiyu daga lowo geeshsha miicantanni sa’inotano qaagiissinohu songaafichu Selemooni Laallehu; soorrote mootimma daganke miicammetenni fultanno gede loossara agarrannitano huwachishino.
Wocawaaro 24/2014M.Dni gobbate deerrinni IFDR dagate riqiwamaano amaale mininni haaro mootimma sanfanni; hakkiinni aaneno qoqqowubbate uurrannoha ikkanna Sidaamu dagahu haaru amaale minino 190 miilla amadannoho; kuri miillano aantanno onte dirrana Sidaamu daga massaggannore ikkansanni bayi’riidi seeri yaanno garinni tii’’insara, doortino dagansanna bayi’riidi seerira woshshantannore ikkansanni konne ayirrisse loosa hasiisannotano qaagiissino.
Dagate latishshunna danchu gashshooti xa’muwara hasiissanno dawaro qolatenni horaameeyyimmansa buuxisiisateno umihunni babbaxxitino seerubba fushsha hasiissanno; albaannino qoqqowo massanganni gede 16 lallawubbanna wodho hatono bayi’riidi seera fushshinoonnihano ikkiro xaano lende fushshinara hasiissanno wodho nootano qummi assino.
Haaru amaale minino albaanni fultino wodho lae haaro lendannitano fushshihu gedensaanni seera fushshitannore, tirtannorenna jeefissannore mootimmate bissa harunsanna qorqorsha assatenni fultinota tonnu diri, ontunna aananno 2014M.D mittu diri giddo loonsanni loossa mixo seekkite keente fultino hexxo dagate horo uyitannota ikkasenna hoogase buuxxe la’e kaajjishatenni loosu giddora ea hasiissannotano coyi’rino.
Amadisiiseno loosose guddinota akkala amaale mine geegiissatenna haaro amaale mine haa’ne gatamarate qixxaawo assinoonnitano qummi assino.
Amsaalu Felleqe
Bakkalcho Fooqa 4/2013 M.D Hamuse
