Addis Abebunni:- Haaro mootimma safantanni heedhe gobbate wolambinatenna keere agarsiisate widoonni batinyu mini loosi agarannoseta seeru amaalaanchinna yekkeeramaanchi kalaa Taammitaar Kidaane maariyaamihu xawisi.
Kalaa Taammiraati Wocawaaro 24 2014 M.D nni gumulantanno yine agarranni haaro mootimmate safonna agarantanno loossa lainohunni baxxinohunni uurrinshinkera xawisino garinni; haaro mootimma akatoomu noonsakkire, keeraano daga minna giirtannorenna mulqidhanno bissa aana seeru qaafo adhatenni seera agarsiisa balaxote loosose assi’ra noose.
Konni gedensaanni mootimma uurrinshunni Onte dirrara gobba gashshitannota anfoonniha ikkinohura hiittoohuno adhamooshshu qarri dikalaqamannose yaanni coyi’rino.
Seerunnita gargadhate qaafo adhatenni gano iillinshanniha ikkiro, badhera higgannokkiha ikkiro, hasiissanno qaafo adhatenni assoote diiga haaro mootimmanni agarranni looso ikkasi kalaa Taammiraati xawisino.
Mootimmate biilloonyu yanna jeefama, albihu xaphoomu ministrchi Haylemaaryaam Dessaalenyihu biilloonye agureenna haaru xaphoomu ministrchi Abiy Ahimedihu riqiwamasinna soorrote yanna ikkase mootimma ga’labbi yitannokki gede assitinota xawisino.
Doorsha Assini yanna ikkasenni mootimma mitto widoonni doorsha qeelate daga koffi assa hoogate sharro assate, wole widoonni keere halashshatenna seera agarsiisate assinanni sharro mereero hdote xaaga hooga heedhanno yino.
Gobbate wolambinate agarsiisatenni mootimma woshshatto assite dagooma qoteho uurrisirase kaysinohu kalaa Taammiraati; haaro mootimma safantanni heedheennanni gargarooshshu wolqase gatamadha agarantannose yino. Teknoloojetenni kaaajjishi’rate hananfoonni qaafo kaajjishatenni baxxinohunni Aliyye widoonni iillitino gawajjo kiisa hasiissannotano lede kaysino.
Gobbate keeraanchimmanna seera agarsiisate jawiidi hale dagate; daga qoteho uurrisiranna adawu loosira beeqqaano assa haaro motimma mini loosooti yino.
Poletiku mannootinna egennaammu mereero sumuu yaa hooganna yekkeero heera hasiissannota ikkase kulatenni ; tini yekkeero sumuu yaate widira daa hasiissannose. Badooshshe adhe sufa sa’e sa’’eno ikkiro shiima huuro afidhinori agarranninsa qoosso heedhuro agarsiisa hasiissanno. Poletiku mannootinna babbaxxitinori dagoomu bissa addi addi gobboomu hajubba aana sumuu yaate widira iilla hasiissannonsa.
Wo’ma hasiissannonsa amanyootta wo’miteenna, hasaawa assine Woyyaawa hasiissannonsa hajubba woyyeessa hasiissanno yinohu seeru amaalaanchi kalaa Taammiraati;’’ baalunku gobboomu sumiimmanna ammanamate aana iillinummoro mitte keeraanchimmate hajo taaltanno’’ yino.
Wocawaaro 24 2014 M.D haaro mootimma uurrinsannita, mootimma safate assinanni hee’noonni qixxaawo dagate riqiwamaano amaale mini Afegubae Taaggese Caafohu xawisino.
Ella 14 2013 M.D nni harinsoonni doorsha harunsine afi’noonni gumi garinni mootimma safate dandiissannoti seeru harinsho hee’raseno qummi assino.
Bakkalcho Fooqa 4/2013 M.D Hamuse
