Itophiyu Shalleette Biheeraawe gaamo kalqete shalleettete Champiyoonnira beeqqaancho ikkate qixxaawo assitanni no. Kalqete Shalleettete Chaampiyoone Awuropu kiironni Wocawaaru aganira 19-26/2021nni Beeljiyeemete Filaadersi Qoqqowira shoole quchumma qixxaabbeenna harinsannita kulloonni. Itophiyu Shalleettete Federeeshiine tenne Chaampiyoonera beeqqaancho ikkate hasiissannose qixxaawo assitanni leellannota Federaalete Ispoortete Komishiine dagoomitte mashalaqqe qoolira borreessinoonni mashalaqqe leellishanno.
Heewotenni Itophiyu jajjabbunna wedellu, lamunku koo/teenni, hallanyunna gaamote heewo daninni beeqqaano ikkate qixxaawe noota anfoonni. Federeeshiinete womaashshu qarri nafa hee`riro gobbatenna kalqete deerrinni qixxaabbanno heewo aana beeqqanna Olompikete godo`lera uynanni mannu koota halashshate noosi qeechi luphiimaho. Konnira, addi addi kaa`lo assitannori wiinni womaashsha gamba assate wo`naalanni noota xawisino.
Muli kawa jeefo afi`rinohu Tokkiyo 2020 Olompikenni, Itophiyu Shalleettete ispoortenni beeqqaancho ikkate dandiitinohu, balaxxe Afiriku Chaampiyoonera beeqqaancho ikka dandiitinohuraati. Tenne heewonni Afiriku gobbuwanni woyaabbino beeqqo nooseti Itophiyu, Olompiketeno beeqqaancho ikktanno gede kaayyo uynoonnita Federeeshiine qummi assitino. Biheeraawete gaamo tenne heewora beeqqaanocho ikkitanno gedenna guma abbitanno gede baalanti bissa irkonna kaa`lo assitanno gede woshshatto assino.
Abrahaam Saamueel
Bakkalcho Fooqa 4/2013 M.D Hamuse
