Addis Ababa:- Gobba jawa jifo giddo noo yanna dancha dago horonsidhe uduunnu aana hasiisannokki waaga leddanni hirtanno daddalaano cancishaanchu HWHT gaamonni bande la’nannikkire ikkansa Hawaasi Yuniversite Maarketing Maanejimentete Rosiisaanchinna Xiinxallaanchi pirofeeser Birhaanu Borjehu egensiisi.
Pirofeeser Birhaanu baxxinohunni Itophiyu pireesete uurrinshara xawisino garinni; mitu mitu honqooqa daddalaano gobbanniha yannate akatanna jifo uminsara dancha kaayyo gede horonsidhe dikkote aana laalchunna uduunnu anje noohu gede lawisatenni hasiisannokki waaga leddanni dagooma caacceessitanni afantanno.
Gobba jifote giddo e’inota tenne qarru yanna dancha dago gede horonsidhe uduunnu aana seerimale ikino garinni waaga leddanni afantanno daddalaano cancishaanchu HWHT gaamonni bande la’annire ikkitinokkitano huwachishino.
Xaa yannara Aliyye gobbanke qooxeessira cancishaanchu HWHT gobbate ayirrinye shollishatenna hakkiinnino sae gobba diigate giddoydinna gobbaydi diinna ledo halame gobbanke aana fanino ola sharramatenni gobba gatisate gaado harinsanni hee’noonnita qaagiissinohu pirofeeser Birhaanu; mitu mitu honqooqa daddalaanonna miinju xagarro kalaqqanno gaamo quchummate laalchu aana hasiisannokki waaga ledatenninna dagooma caacceessitanni afantanno yino.
Kuri honqooqa daddalaano uduunne maaxxanninna xooqissanni, dikkote giddo uduunne dallaalu widoonni luphiimu waaginni geexaanote shiqanno gede assatenni dagoomu heeshsho aana qarra gantanni afantannotano qummi assino.
Amsaalu Felleqe
Bakkalcho Fooqa 4/2013 M.D Hamuse
