Addis Ababa:- Gobbanke aana Juntu kalaqanni noo gawajjo halamme gargadha hasiissannota Sidaamu dagoomu qoqqowi mootimma pirezidaantichi kalaa Desta Ledamohu egensiisi.
Cancishaanchu HWHT qodhaano gobba diigate hasattonsanni baxxinohunni Aliyye gobbanke qooxeessira mannu, saadatenna jajju aana jawa gawajjo iillishshanni noo kaiminni gobbate aana kaino diina wo’manti gobbanke daga halante sharrama hasiissanno yinohu pirezidaantichu; xaa yannara rooru oli noohu Amaaru qoqqowira ikkasinni tenne lamalara Sidaamu qoqqowi motimma pirezidaantichinni massagantino gaamo qoqqowoho leellite olunni gawajjantino bissara kaa’lo assitinotanna sharrantanni noore gobbate gargarooshshu olanto, Sidaamunna wolootu qoqqowubba addi olantonna wolootano ga’labbote bissa basete leelline jawaachinshooonnita coyi’rino.
Cancishaanchu HWHT harinshonna hunote assootesi albanni seekkine anfoommohuranna Sidaamu dagano tenne gaamonni miicantanni keeshshitinoti soorrote massagaanonni xa’mosera dawaro afidhinotanna ayimmase buuxisidhe fultinota xaano wirro hige afi’noonni kaayyonna anganni adhatenna kade gashshate hasattosi wo’mitannokki gede assatenna aanteteno gobba gatisate sharrora gargarooshshu olantora hasiissanno irko assinanni hee’noonnita pirezidaantichu kalaa Desta uuxisino.
Baxxinohunni tini akkalu dirinni haaru dirira sa’nanni hee’noonnita ayyaanu yanna ikkitinohura olu dargira lubbonsa sayisse uyite gobbansanna dagansara sharrantanni noore basete leelline haaru dirira hawalle iillishi’ne yaatenna guuqinonsare xa’mine afatenna aye woyteno badhensaanni ledonsa hee’noommota xawisateno hende qoqqowu deerrinni qixxaawo assine marre towaantoonninsatano xawisino.
Towaanyonkennino Amaaru qoqqowira lowo manni darame gobba qiidahonna injiinokki garinni noo daafira taaga ninke qoqqowo safi’numo barra badhete uurrenke yineenna wolootu qoqqowubbante gede Amaaru qoqqowi pirezidaantichi loosu miillasi ledo qoqqowonke daye mitiimmankera iillinonke; hakkiinni sae insa ilama ikkino dureessichino umisinni 15 miiliyone birra noosi jironni kayse uyinonke yinohu qoqqowu pirezidaantichi; konni mannira qarru iilli yannara kayinni mine ofolline la’nannikkihura daganke milli assine dureeyyeno noonsaha haadheenna marre roduuwimmate kaa’lo assinoonni; gawajjantinonna darantinore jawaachinshoommo; xaphoomunnino lame sase hajo amande ha’ratenni danchu garinni jeefinse hingoommo yino.
Assinoommo towaanyonnino Juntu baxxinohunni Amaaru qooxeessira lowo gawajjo iillishinota buunxoommohano ikkiro xa mootimmanna dagano halante adhitanni noo qaafonni kayinni albillicho muli yanna giddo wirro ka’’annokki rumuxxannokki garinni rumushshosi buqqinse hunatenni gobbatekeere buuxinsannitano huwantoommo yino pirezidaantichu kalaa Desta.
Togoonni dagatenna gobbate aana hilo iillishshannore Juntu wolqa Itophiyu daga mittimmatenni halante sharramatenni Junta waante gobbanke gatisanna wolambinatese buuxisiisa agarrannitano qummi assino; pirezidaantichu.
Pirezidaantichu kalaa Desta amadisiiseno 2014M.D haaru dirira hawalle iillishi’ne yaanni xaa yannara mittimma kaajjishi’ne assinanni hee’noommo hirbinni ga’labbote hoongira korkaata ikkitino bissa baalanti ba’eenna; Itophiyu olunni fule latishshaho alba higeenna woyyaabbino gobbara woyyaabbino heeshsho hee’neemmo yanna ikkitonke yaanni halchosi xawisino.
Amsaalu Felleqe
Bakkalcho Fooqa 4/2013 M.D Hamuse
