Itophiyu aana ka’ino moromaano soodo loji gede giggilte ba”ansa digattannote yaatenni IFDR Aantichu Xaphoomu Ministirchinna Gobbaydi Hajo Ministirchi Kalaa Demmeqe Mekkonninihu xawisi.
Kalaa Demmeqe, Birisheloqote safote olu qajeelshi oyimbarra 34ki doychora qajeelshitino olanto maassiissu yannara coy’rino garinni, gobbate ijaarshi doogo dhagge lowore leellishshinonke. Nookki hexxonni dinbitinori haaqensa baatto dirrisate batinye balla untannoha ikkanno; kayinni soodo loji gede gilgilte ba’ina la’noommo. Moromaanchu juntu gaamo miillano konninni baxxino kaayyi xaadannonsakkita seekkine coy’ra dandiineemmo yiino.
Kalaa Demmeqe xawishshi gede, hawadi okkoshaama gede fincantino moromaano waamamansa harancho yanna giddo buuxisiisatenni Itophiyu jireenya hembeeltannokki safo aana ijaarsate sharronke kaajjite suffanno.
Kuri fayyate gede iillitu darga baala diigganni noonke diinanke rahotenni hunatenni gobbate hee’ra buuxisiisa co’o dinye uynannikki hajooti yiino.
Kuri dhaggete hadhaasine gobbanke qotinni giggishshate xaphooma Itophiyu daga ama gobbase woxaratto adhite qaccetenni qaccete geeshsha millissinono yiinohu Kalaa Demmeqe, baalunku noosi ogimmasinninna loosisi handaarinni gobbasi ayirrinyira qeechasi fulanni noo gedenna gobbasi mittimmanna olantote qixxaambe diina xaanni hembeelsitanni noota qummeesse; olu xawira cancishaancho junti gaamo wirro Itophiyu yaaddo ikkitannokki gede assinanni gaadi kaajje sufino yiino.
“Itophiyu woxaratto assituta shoolunku raginni gamba yitino oosose Doobbu gede ittissanni, Dagunchu gede hanqite, diidu gede mitto ikkite gaaddanno. Xa xawoho leellenni noohu konneeti. Gadachu gaado adhate qixxaabbino qarru barri ooso hee’rase Itophiyu hegerera waajjantenna ayirrisante suffanno jawa gobba ikkase baxillaanchohono ikko diinaho kaajjadonna xawo sokka sayissinota ikkitino” yiino.
Bareedda iltino Itophiyu baatto aana mamooteno ikkiro moromaano injeessidhe heedhe diegentino; konni albirano diheedhanno yiinohu Aantichu Ministeerchinna Gobbaydi Hajo Ministeerchi kalaa Demmeqe, Itophiyu bubbino bareedda oososenni hegera waajjantenna ayirrisante heedhanno yaatennino sokkasi saysino.
Itophiyu otootto sannate lamu dani ilama ilantinni techora iillitino. Mitto ragaanni gobbaydi sokka gumulaano ikkatenni gobba diigate dodantannore ikkanna, wole ragaanni kissinoontenke yaatenni gobbate hee’ra ayirrisiisatenni ama gobbansara agaraanchimma uurritino bareedda iltino yiino.
“Gobba cancishaanchunni shollinyunna moromamme iillitanna la”a ayinnino aleenni goxicho ho’litino’nenna gaabbote heewonni ka’inoonni muxxe Itophiyu ooso noo’ne amanyootinna rosate hasatto heedhinoonni bareendete qixxaawo leellishshino” yaatenni xawisino.
Jeefoteno Kalaa Demmeqe, kiffalla olanto olaho qixxaabbinore assate daafudhini qajeelshiishanorano naaxxisiisanno looso loossinoonnina galatu hasiisanno’ne.
Addisu Adoola
Bakkalcho Fooqa 4/2013 M.D Hamuse
