Addis Ababa: Cancishaanchu HWHT rosu polise hunatenni ilamate aana iillishino gawajjo ikka hooggeennasi rosu minna kaampe assatenninna wole owaantera hosiisatenni gawajjo iillitannonsa gede assinota Amaaru qoqqowi rosu biiro sooreessi Dr Yiliqaal Keffaalehu xawisi.
Dr Yiliqaal baxxinohunni Itophiyu pireesete uurrinshara xawino garinni; rosu minna kaampe assatenninna wole owaantera hosiisatenni batinyu rosu minna aana gawajjo iillitanno gede assino.
Daga buxisatenni, shaatenninna mulqatenni luphiima gawajjo iillishinota coyi’rinohu Dr Yiliqaal; cancishaanchu gaamo rabbiseemmo yino garinni Amaaru daga aana luphiima gawajjo iillishanni afamanno. Assootu Amaaru daga hunate, tiiu gawajjo iillishatenna shollishate fannoonni olaati yino.
Horraano gaamo rosu minna kaampe assatenninna wole owaantera hosiisatenni batinye rosu minna aana gawajjo iillitanno gede assino. Akatisinni mulqaancho ikkasinnino kompiitere, wo’naalshu minenna babbaxxino horonsi`nanni uduunnenna tajubba rosu minnanni mulqino, gatinohano diige hunino yino.
Cancishaanchu HWHT gaamo rosu minna dooranni jajjabba olu uduunne horonsi’ratenni haammata rosu minna diigantanno gede assino, xaano diiganni afamannota buuxisino.
Xaphoomunni 1.5 miiliyoone rosaano rossannowi 3 kume meddi yitanno rosu minna qarru aana afantanno yee; 140 rosu uurrinshuwanna 2 rosiisanote kolleejjuwa aana lowo gawajjo iillitino yee; xaphooma waaginsano 3 biiliyoone birra ikkannotano coyi`rino.
Isi xawishshi garinni, Aliyye Gondere, Waaghimira, wodiidi Gonderenna Aliyye Wollo qooxeessuwa baalantera afantanno rosu minna horraasinenna doddolaano wolqanni gawajjo iillitinonsa.
diigamansa garunni buuxantino rosu minna gobbaanni cancishaanchu gaamo horrite amaddino qooxeessuwara 2 kumenna 8 xibbe ikkitanno rosu minna ma deerri aana nooro anfoonnikkitano coyi`rino.
Konne qorqorate mootimma qoqqowu deerrinni komite tantanatenni horraano wolqa diigginoha safote latishsha mootimmatenna hallanya uurrinshuwa iillitinonsa gawajjo bikka xiinxalle tittirshunni egensiissanno yino.
Kunni cancishaanchu gaamo akati mulqa, diiganna dagoomu daramanno gede assate yinohu Dr Yiliqaal; alba mootimma ikke gobba gashshi yannara noo rosu polise kaimunni qarru noosete; kunino xiinxallotenni buuxamasinni soorramanno gede assinoonni yino.
Cancishaanote gaamo ola harissanni noohu uminsa jironna uduunne gamba assate ikkinota buuxisinohu sooreessu; gobba diigate hedonsa seekkannonsakki gede Amaarunna xaphoomunni Itophiyu daganni qeelantanni no; ba’’ansano gattannokkiha ikkasinni mittimma kaajjishatenni halamme loosa hasiissanno yino.
Abebech Maatewoos
Bakkalcho Woxawaajje 27/ 2013 M.D
