Addis Ababa:- Ameerikunniti kaa’lote uurrinsha (USAID) cancishaanchu HWHTni mulqantinota buunxi.
Cancishaanchu HWHT Ameerikunnita kaa’lote uurrinsha (USAID) magaazene mulqinota Itophiyahu uurrinshate dayrektere Siin Joonsi coyi’ri.
Ameerikunnihu kaa’lote uurrinsha (USAID) Itophiyu soqqansho dayrekterichi Siin Joonsi xawisino garinni HWHT ikkito doogimale horonsi’ranni noota ammanneemmo yino.
Kaa’lo hasiissannonsa qansooti anganni wolqise kaa’lote gidenna xagga mulqanni noota anfoommo yinohu dayrekterichu; cancishaanchu HWHT hunote gaamo luuxxe e’ino base baalantera kaa’lote shiqinshoonnire duunnoonni magaazene baala mulqitinota coyi’ra dandiineemmo yee; kunino anfoommohonna kaandannikki halaaleeti yino.
Xaa yannara seekkine buunxoommohu HWHT qodhaano e’inowa Amaaru qoqqowira babbaxxitino qooxeessuwara kaa’lote gidenna xagga duunnoonni magaazenna mulqitino; kaameellano moortino; base baalate lowo gawajjo iillishshino yinohu dayrekterichu; kuni assootinsa kayinni kaa’lo hasiissannonsa mannootira ikko ninke kaa’lineemmorira lowontanni bidhatto ikkinonkeho yino.
Ameerikunnihu kaa’lote uurrinsha (USAID) Itophiyu soqqansho dayrekterichi Siin Joonsi Itophiyu giddo millinseemmohu gobba xaa yannara qarru giddo e’ino daafira di-ikkino yino.
Itophiyu kalqete noo danchu xaadooshshi noonke gobbuwa mereerinni mittete yinohu dayrekterichu Itophiyu ledo noonke roduuwimmanna halammenni kalaqantanni noo ikkito lowontanni yaadissinonkete yino.
Mite mite yannara dagoomu dagoomitte mashalaqqete qoollara laddinannire kaphu mashalaqquwa adhatenni Itophiyunna Ameeriku xaadooshshi albi gede ikkinokkitanna lamente gobbuwa mereero danchuri nookkita heddanno yinohu dayrekterichu; kayinnilla tenne yanna gede Itophiyu ledo halamme loonsoommo yanna nooha dilawannoe yaanniiti coyi’rinohu.
Amsaalu Felleqe
Bakkalcho Woxawaajje 27/ 2013 M.D
