Lokka:- Lokka Abbaayyu woradira goyirete loosinni 71 kumi kuntaali ale laalcho afi’rate mixi’ne loonsanni hee`noonnita Woradu gashshooti xawisi.
Lokka Abbaayyu woradi qaru gashshaanchi Kalaa Zerihun Xilahun xawisino garinni; goyrete yanna loossanni Wahetenna Gaashete laalchi aana illachiishe loonsanni hee’noonni.
Woradaho 2 kume 525 heektaare baatto aana Wahe latinsanni hee`noonnita xawise; mitte heektaarenni 20 kuntaali ale laalcho afi`rate mixi`ne latinsanni hee`noonni yiino.
Qoleno 1 kume 788 heektaare baatto aana Gaashe latinsoonniha ikkanna; mitte heektaarenni 12 kuntaala laalcho afi`rate mixo amande loonsoonnita xawisino.
Xaphooma 4 kume 313 ikkitanno heektaare baatto Wahetenninna Gaashetenni dinboonnita kule; 71 kumi kuntaali ale laalcho afi`rate mixi`noonnita buuxisino.
Kalaa Zerihuni xawishshi garinni; woradaho laalchonna laalchimma lossate hasiisanno waaco baala hafanfarre xaaddukkinni shiqeenna dagate beenkoonni. Deerru deerunkunni noo dagooma kakkaysatenninna ogeeyyetenni irkisatenni ikkado guma laashshate hixamanyine loonsoonni yiino.
Diru dirunkunni laalchu lexxo luphi yitanni daggino yiinohu kalaa Zerihuni; kunino yannite tekinolooje, dooramino wixa, bushshu madaabara hattono baadillicho harishsha garunni horonsi`ratenni ikkinota coy`rino.
Lokka Abbaayyu woradira haammatu seeftineetete irkonni galino dagoomi noo warada ikkasinni goyrete latishsha gobbatenna qoqqowu gede illachiinshe loonsanni hee`noonnita coyi`re; kaa`lamooshshu innisheetivenni fano baatto bande latinsanni afammannino yiino.
Woradaho anga ajino dagoomi laalchu irkiraanchimmanni fulanno gede assatenna meessi dhukinni irkisate loosono kaajjinshe loonsanni afammannita buuxisino.
Kaa`lamooshshu innisheetivenni woradu giddo fano noota mootimmatenna hallanyootu baatto bande horonsi`ratenni 86 heektaare ale ikkitanno baatto gaashete laalchinni diwa dandiinoonni. Konninni, 1032 kuntaala gamba assinanni yiino.
Ikkinohura woradaho gaashenna wahe, maxaaxeessa, timaatime, gati shaana, kaaroote hattono wolootu laalchinni xaphooma 7 kumi ali heektaare latisa dandiinoonnita gashshaanchu egensiisino.
Woradaho laalchonna laalchimma lossate deerru deerrunkunni noo massagaanonna dagooma kakkaysatenni wolootta woraddara rosicho ikkanno looso loonsoonnitano buuxisino.
Abrahaam Saamueel
Bakkalcho Sadaasa 17, 2017 M.D
