Addis Ababa:- 2017 baajeettete dirinni Bocaasu agani geeshsha 1.5 miliyoone qansootira uurrinshu loosu kaayyo kalanqoonnita IFDR Loosunna Dandoote Ministere egensiissu.
IFDR Loosunna Dandoote ministircho dukko Muferiyat Kaamiil xawissino garinni; baajeettete dirinni gobboomu deerrinni 4.9 miliyoone ikkitanno qansootira gobbate giddonna gobbaydi gobbuwara loosu kaayyo kalaqate mixi`ne loonsanni hee`noonni.
Konnira, dandootenni massagantino loosu hayyo diriirsatenni looso hasidhanno qansootira qajeelsha uyinanni loosu widira e`anno gede assinanni afammannita xawissino.
Qooxeessubbate noo jiro badatenni loosu kaayyo kalaqora horote aana hosiisa hasiissanno eltuwa badatenni elto kaima assitino loosu kaayyo kalaqo loossa gumullanni hee`noonnita huwachishshino.
Qansoota horaameeyye assatenna gobbate latishsha buuxisiisate kaajjine loonsanni hee`noonnita kayisse; xaa yannara nooti loosu kaayyonna dandoote latishshi qajeelshi ragaanni noo hasatto luphiima ikkitinota buuxissino.
Loosu kaayyo kalanqoonnihu gibrinnunni, owaantenna Industire lede wolootta manaadda handaarranni ikkinota Ministircho buuxisse; loosu kaayyo kalaqate loosi kaajje sufannotano egensiissino.
Loosu kaayyo kalaqo loosi fayinaansete xe`ne korkaatinni gufisamannokki gede maakirote fayinansuwanna baankuwa fayinaanse shiqishshanno amanyoote diriirsinoonnitano ledde buuxissino.
Wedellu kalaqote hedonsa loosu widira soorra dandiisiissanno amuraatta gumullanni afammanni yitinoti dukko Muferiyati; wedellu labbeemme injiitanno akatubba horonsidhe loosu giddora e”a hasiissannota qummeessitino.
Tekiniiketenna ogimmate qajeelshi handaarinnino gobbaydinni e`anno laalchubba gobbate giddo tekiniiketenna ogimmate uurrinshuwanni laashshante riqiwantanno gede assate hanafono jawaachishshannote yitino.
Handaarunni uyinanni qajeelshi isilanchimma luphi assateno baajeettete dirinni 21 kume ikkitanno qajeelshaanora qajeelsha uyinoonnita xawissino.
Qansootu horaameessimmanna gobbate latishsha buuxisiisateno kaajjine loonsannita dukko Muferiyati egensiissino.
Abbebech Maatewoos
Bakkalcho Sadaasa 17, 2017 M.D
