Hookko:- Hookkote woradira kalaqamu shiilo laashshitannore babbaxxitino maamarra tantanne bobbaansoonnita Woradu gashshooti egensiisi.
Hookkote woradi qaru gashshaanchi kalaa Lemmi Hagoosi xawisino garinni; woradu baxxinohunni shiilote dhuki noosiha ikkasinni latate dhuka afi’rino.
Woradaho xiinxallotenni bandoonni shiilo haammata ikkitinota xawise; konni giddo xaa yannara talku, culqu, ayirradu kinchi, hattono bushsha xagisa dandaannohu nooru shiilinna woloottano noo worada ikkasi xawisino.
“Talke” yinanni shiilo woradaho Iltami olliira nooha ikkanna; maamarra tantanne laashshitanno gede bobbaansoonnita qumeessino.
Hattono, Culqu shiilono maamarunni tantannoonniri loossanni afantanno yee; baadillicho ikkitino hayyonni wayinni hayishshatenni gamba assinanni hee’noonnita buuxisino.
Woleno, bushshu kalaqamu shiilosi hooge laalcho aannokki yannara xagisa dandiinannihu nooru shiilo nooha ikkanna; mittichu dureessichi tenne Investimenetenni bobbahe laashshanni noota Gashshaanchu egensiisino.
Woradaho noota shiilote jiro gumaame assate widoonni ikkado ikkino loosu maashine horoonsi`ne fushshinannikki daafira xaa geeshsha ikkado guma afi`ra dandiinoonnikkita qummeessino.
Kalaa Lemmi xawishshi garinni; haammata dureeyyenna kubbaaniyyootu woradaho shiilo laashshate loosi handaarinni bobbahate hasatto noonsaha ikkirono; babbaxxitino xintu latishshi hala’la hoogate korkaatinni xaa geeshsha bobbakkinori boode dureeyyeeti.
Tenne yannara woradaho 200 ikkanno wedelli culqu shiilo laashshate handaarinni tantanante loossanni afantannota lede qummeessino.
Abrahaam Saamueel
Bakkalcho Sadaasa 17, 2017 M.D
