Addis Ababa:- Baaru furcho hajo wo’mante Itophiyu daganna mootimma hajo ikkasenni Ferensayetenna pirezidaantichi Maakrooniwinni jawa irko agarrannita Xaphoomu ministichi Abiy Ahimed (Dr) coyi’ri.
Ferensayeno dandaami bikkinni irko assitannota pirezidaantichu Imaanueel Maakrooni coyi’rino.
Ferensayete pirezidaantichi Imaanueel Maakroon sa’u muli barrubba giddo Itophiyaho mittu barri faajjete loosu towaanyo laisse lamunku massagaano gutunni uytino xawishshinni; Xaphoomu ministirchi Abiy Ahimed (Dr) Itophiyu keeru doogonni Baaru furcho afi’rate hasatto nooseta pirezidaantichu Maakrooni ledo torbitinota egensiisino.
Wiinama miinju lopho leellishshanni nootinna 130 miliyoone ale daga nooseti Itophiyu kalqoomu seeri garinni, keerunna dipilomaasetenni Baaru furcho afi’rate assitanno wo’naalsha Ferensaye labbinori baxillaano gobbuwa irko hasiissannose. Tenne irkote xa’monkeno Ferensayete pirezidaantichi Maakrooni ayirrinyunni adhino yiino.
Pirezidaantichu, irkote xa’mo maahoyye yee haarino daafira galatasi shiqishinohu Xaphoomu ministirchi Abiy; wo’manti Itophiyu daganna mootimma Ferensayete pirezidaantichi Imaanueel Maakrooni Baaru furcho hajonni gummaame dawaro agadhitannota qummeessino.
Itophiyu harissanni afantanno miinju woyyeesso toltanno gede Ferensayete
Pirezidaantichi luphiima irko assanni afamannotano qaagiissino.
Pirezidaantichu Imaanueel Maakrooni isi widoonni; Itophiyunniti Baaru furcho afi’rate xa’mo garaho; xa’mo dawaro afidhanno gede Ferensaye dandaamise bikkinni hasiissanno irko assitanno yiino.
Xa’mo hasaawunninna amaalammetenni, kalqoomu seerubba garinni hattono qachu gobbuwa utuwimma ayirrissino garinni xawaro afidhanno gede wo’naallannita kaysino.
Ferensaye budunna donate jawa illacha uytannota kaysinohu pirezidaantichu Maakrooni; Itophiyahono babbaxxitino donna gatamarate loossa harissanni afantannota qummeessino.
Pirezidaantichu Maakrooni towaanyote gedensaanni X mashalaqqeete qoolisira Amaaru afiinni saysino sokkanni; Itophiyu manchi beetti sirchi afamino gobbaati. Itophiyunna Ferensayete mereero noo xaadooshshi dhaggetenninna gutu pirojektubba aana safaminoho yiino.
Massagaano lamente gobbuwa Investimentete, budunna rosu handaarranni halante loosate dandiisiissanno hayyo laisse
Pirezidaantichu Maakrooni Addis Ababaho assino keeshshonni kolidda daga wolaphora sharrante kakkalantino bareedda qaagate hawulte hundaanni daraarote goodo worino. Adiwu qeelle qaaggote ijaarano towaatino.
Gaazeexu Odeessaanchinni
Bakkalcho Sadaasa 17, 2017 M.D
