Addis Ababa:- Oromomiyu qoqqowi mootimma ledo muli yannanni keeru sumimme assitinori Oromote wolaphote olanto riqiwamaano Oromiyu amaalammete sirnya gamba assate amaalammete bare beeqqansa jawa seyoo ikkase Komishiine xawissino.
Gobboomu amaalammete komishiine qaru komishinerchi Profeeser Mesfin Ariaya Oromiyu qoqqowira sirnya gamba assate amaalammete gafi jeefamase lainohunni uyino xawishshinni; qodhote sharro giddo noo qansooti amaalamme beeqqitanno gede assate marro marro higge qixxaabbinore ikkansa xawissanni keeshshitino.
Muli yannanni Oromiyu qoqqowi mootimma ledo sumimme kalaqqinori Oromiyu wolaphote olanto massagaano riqiwamaano amaalamme beeqqansa jawa seyoo ikkitinota egensiisino.
Amaalamme mittu qeelaancho wolu qeelamaancho ikkanno harinsho ikkitukkinni baalunku qeelaancho ikkanno bare ikkase coyi’rinohu qaru Komishinerchi; amaalamme mimmito macciishshatenni, macciishshammetenni roore korkaatunni ammanatenninna mararrooshshe balaxisiisatenni sumimmenniwa iillineemmo doogooti yiino.
Qaru komishinerchi xawishshi garinni; Sadaasa 7, 2017M.D nni hananfe harinsanni keeshshinoonniti Oromiyu qoqqowi sirnya gamba assate gafinni 7 kumi ali beeqqaano hasaawisatenni dhaggete bare ikkite jeeffino.
Amaalamme shoole jajjabba kilaasterubbanni bebbeenke harinsoonnita coyi’re; 5 barrubba adhitino harinshonni 640 amaalammete gaamo tantananteenna xawado hasaawa assansa xawise; hedo badate loossa gaamo gaamotenni garunni gumulantinota coyi’rino.
Aantete gumullanni gobboomu amaalammete gambooshshira 320 dagoomu bissa riqiwamaano, 12 hedote massagaanonna macca mannooti riqiwamaano, 31 mootimmate riqiwamaanonna wolootuno doorantino.
Doorshu luphi yitino hedo la’noonniha, xawadonna beeqqisiisaancho ikkinota xawise; xaa yannara riqiwamaanonsa egensiissinokkiri amma’note uurrinshuwanna poletiku paartuwa uurrinshuwa komishiinete massagooshshi garinni aantete uurrinshansa widoonni riqiwamaanonsa egensiissannota qummeessino.
Miidiyu bissa Oromiyu hedo gamba assate amaalammete bare dagate iillishatenni assitino beeqqora galata shiqishinohu qaru Komishiinerchi; amaalammete harinsho gumaame ikkitanno gede hasiissanno halammenna irko assitinnore wolootta bissano galatino.
Amaalammete hedo gamba assate harinsho gobboomu deerrinni beeqqitanno gede doorantinori babbaxxitinori dagoomu riqiwamaano uyinoonninsa yawo fula hasiissannonsata huwachishino.
Qiddist Gezzaheny
Bakkalcho Sadaasa 17, 2017 M.D
