Muli yanna kawa gobbate deerrinni kalaqantinoti waagu lexxo heeshshonsa aana luphiima qarra kalaqqinota mite mite Sidaamu qoqqowi teesaano xawissu.Uurrinshinkera hedonsa uytinori qoqqowu giddo babbaxxino qooxeessira heedhanno teessaano harancho yanna giddo baalunku laalchi aana xa noo deerrinni waagu lexxino korkaata mootimma xawo assitankera hasi’neemmo yitino.
Hedonsa uytinori qoqqowu teesaano mereerinni Hawaasi quchumi teesaancho ikkinohu Yohaannisi Dugunihu coyi’ranni; quchumaho baxxinohunni Minu kira lede Sagalete horonsi’nanni wo’munku uduunni aana luphi yino deerrinni waagu lexxinota kayse konninnino dagoomu heeshsho aana luphiima xiiwo kalaqanni noota xawisino.
Konni gobbaanni dagoomaho mootimmate irkonni daannoha Zaytenna Sukkaare lawino laalcho afidhukkinni lowo yanna ikkinota kule gashshootuno konne qarra woyyeessanno gede duu’re hedosi worino.
Woleno uurrinshinkera koffeenyase xawissinoti qoqqowoho Lakkote quchumi teesaancho Dukko Demmeqechi Taammiruti; waagu lexxa tenneeti yine kullannita di-ikkitino yaatenni heeshsho caacceessitinoseta kultanno. Tini hajo xaa yannara gobba noo akati ledo la’nanni woyte lowo geeshsha ayirritanno hajooti; daddalaanote xagarrono labbanno’’e. Gidunni hanafe shiimaaddu sagalete horonsi’nanninna sagalete horonsi’nannikki uduunni aana kalaqantinoti waagu lexxa dhuku aleenni ikkitinonke.
Mootimma irko assitanno laalcho afi’rate kaayyono ruukkadote. Daddalaanote aanano gargarooshshu olantora sonkanni sinqera hasiisanno gidi ledo amadisiisatenni laalchu anje nooha lawisate ikkitono leeltanno; lowo mitiimma aana hee’noommo; Heeshsho dandiinannikki deerra iillitino. Konni daafira mootimma konni qarrinni fulleemmo furcho fantunkero danchaho. Waagu konni deerrinni lexxara dandiino korkaatano gashshootu xawo assankera hasi’neemmo yitanni hedose xawissino.
Woluno Hawaasi quchumi teesaanchi kalaa Toomaas Waaqohu hedosi woranni; tenne yannanni uduunnu aana waagu lexxa lowo mitiimma ikkitinota xawise; moolu buddeeni konni alba 6 birrinni hidhinannihu xaa yannara 10 Birra einotanna Mitte Siine Bunu 5 birrinni hidhine angannihu 10 Birra einota lawishshu gede kayse Konni alba Mootimmate irkonni olluunni Geexaanote widoonni afi’nanniri Zaytenna Sukkaare co’ontanni uurritinota coyi’rino. Gidu waagino lowo geeshsha lexxinota kule; konninnino lowo mitiimma aana hee’noommo yaanni hedosi uurrinshinkera xawisino.
Konnira mitto kaima ikkinori gobbate noo akata korkaata assatenni daddalaanote xagarro ikkinotanna daga konni garinni cacceessine cancu kalaqamanno gede assate hende loonsanni poletiku sharre ikkitinota kalaa Toomaasi lede kaysanno.
Sidaamu qoqqowi daddalunna dikkote latishshi biiro sooreessi kaa’laanchu pirofeesere Fiqaadu Phawuloosihu uurrinshinkera xawisino garinni; kalaqamunna mannu loosino qarrinni kalaqantinota laalchu anjenna waagu lexxa hundunni tirate giwirinnunna industrete laalcho qoqqowo eessitanno uurrinshuwa ledo qinaambe loonsanni hee’noonni yino.
Konni gobbaanni mootimmate irkonni geexanote widoonni iillannohu Zaytenna Sukkaare lawino laalchi sa’u yannara dagoomaho garunni iillinokkita kaysinohu sooreessu; xaa yannara babbaxxitino gobbate giddo Industurra widoonni Zayte qoqqowo eessate hananfoonni millimmo suffe afantannota qummi assino.
Qiddist Gezaheny
Bakkalcho Woxawaajje 27/ 2013 M.D
