Addis Ababa:- Cancishaano gaamo irkinsanni Tigiraye Qoqqowo`yaati; Itophiyuno gobba`yaati yaa hasiissannoikkita Jireenyu paarte Tigirayete Sini Tantanote Handaari Sooreessi Kalaa Gebiretsaadiqi Gebiremedihinihu xawisino.
Kalaa Gebiretsaadiqi Itophiyu Pireesete Uurrinshi ledo assino hasaawinni coyi’rino garinni; techo gobba hasidhannonsa yannara badhensa uyte cancishaano gaamora kaa`litanni noo bissa gobbate baxilli noo Itophiyu daga waaga baattanni kakkalantanni Juntu aana qaafo adhitu yannara dagge ‘’Tigiraye Qoqqowo`yaati, Itophiyu gobba’yaati’’ yaa dandinannikitanna xa`mantannota xawisino.
Juntunnihu xaadooshshisinna diriirsino siiwo ta’e ba’inokki daafo, Tigirayete noo qansooti gargarto irkisano ikkito Junta gibbe dira fulturonna insa aana ka’uro Juntu insa shaatenna qaafo adhate badhera higannokkihura hedonsa xawisa dandiitannokkita Kalaa Gebiretsaadiqi egensiisino.
Kalaa Gebiretsaadiqi xawishshi garinni, baara wido no Tigirayete Diyaspori dagate miilla wolootu Itophiyu daga ledo halante gobbansa irkisate loosonna Juntu loosannore baincho looso reqecci assate looso loosa dandiitanno.
Cancishaanchu HWHT babbade gashshikkinni hee`ra didandaanno yinohu Kalaa Gebiretsaadiqi; Itophiyu daga babbadama hoogguronna mitto ikkituro biiloonyunni kaysannoe yee, Itophiyu daga babbada hasiissannoe yaatenni hunote looso loosanni no.
Cancishaanchu HWHT Itophiyu daga di-hasi’neemmo’ne yite shorrituta qeelamasi adha giwenna xa`mama hoogate xooqanni Ameerikahonna Gibitsete soqqama doodhe Itophiya qarru giddora tugino yinohu Kalaa Gebiretsaadiqi; konne qarra kayinni Itophiyu mittimmanninna halamatenni sa”a dandiinannita hiikkonne waagano baantiro Cancishaano HWHT mitte hige hegerera bairo Itophiyaho keeru bati’rino gobba ikkitannota qummi assino.
Juntaho soqqante mitore afidhannori mooraano moorinsa gateennansa Juntu sokka haadhe xawoho raartanni noota xawisinohu Kalaa Gebiretsaadiqi; wolu keeraano Tigirayete daga konni Juntu ledo karsama noonsa ikkitanna Juntu irkisaano Tigirayete woganna budi fajjannokki garinni ikkinanni ikkito Itophiyu ayirrinye huntanno daafira tenne ikkito uurrisa hasiissannonsa yino.
Kalaa Gebiretsaadiq, Juntu Affaaretenna Amaaru qoqqowi ledo ola faninohu Tigrayete qoqqowi geannota giwatenna keere hunateeti. Hedosi mitteenni gobbate wolambinatira sharrantanni noore, mimmitu ledo fiixoontino daga mereero mundee dunsiisateeti. Ikkollanna, Itophiyu dagara kaajjado mittimma noonsa daafiranna Juntu sharre seekkite buuxxinohura Juntu bairo Itophiyu keeri wirro higanno yino.
Abrahaam Saamueel
Bakkalcho Woxawaajje 27/ 2013 M.D
