Addis Ababa:- Sidaamu qoqqowira harinsanni hee’noonniti gorsu latishshi loossa milimmo sagaletenni meessaneete dandaate mootimma hanaffino loossa harancho yanna giddo toltanno gede kaa’litannota ikkase Turizimete ministircho Selaamaawit Kaasa coyidhu.
Aliyye Sidaami zoonera 500 miliyoone birrinni ijaarsha hananfoonniri gorsu pirojektubba mereerinni sase ijaarante owaantete fano ikkitinota kulloonni.
Ministircho, Qoqqowunna zoonnate massagaano ledo ikkatenni Aliyye zoone Hawaasi gaangaawi woradira ijaarroonnita Gaallo Argiisu gorsu pirojekte latishshi millimillo sa’u muli barrubba giddo towaanyo assitino.
Ministircho Selaamaawiti tenne yannara coyidhanni; gorsu latishshi loossa sagaletenni meessaneete dandaatenna buximatenni fulate assinanni sharrora qara hayyooti yitino.
Sidaamu qoqqowira harinsanni hee’noonni gorsu latishshi millimillono Buximatenni fulatenna sagalete wowe buuxisiisi’rate mootimma amaddino mixo harancho yanna giddo gumulantanno gede jawa irko ikkitannota farcidhino.
Qoqqowu mootimma gorsu pirojektubba xiinxallo harisatenni safote latishshuwa ijaaratenna gashshate assitanni noo wo’naalshi kaajje sufa noositano huwachishshino.
Aliyye zoone aantichu gashshaanchinna Irshunna Kalaqamu Jiro Latishshi Biddishshi sooreessi kalaa Aseffa Fona isi widoonni; zoonete 500 miliyoone birri fulonni ijaarranni hee’noonni gorsu pirojektubba mereerinni sase gumulante xaa yannara owaante aa hanaffinota coyi’rino.
Ijaarshu loosi goofeenna owaantete fano ikkitinori sase gorsu pirojektubba 510 hektaare baatto latisate dhuki noonsarenna 550 loosidhe galtinore gorsu latishshi horaameeyye assitinota coyi’rino.
Gattinori gorsu pirojektubba ijaarshi loosino harancho yanna giddo gumulamanno gede zoonetenna qoqqowu mootimma kaajjado harunsonna irko assitanni afantannotano ledo xawisino.
Gaazeexu Odeessaanchinni
Bakkalcho Sadaasa 10, 2017 M.D
