Adaama: Gobboomu mitiimmubba luqqise fushshatenni tiro hasate tini dhaggete bareeti yaanni Gobboomu Amaalamme Komishiine Qaru Komishiinerchi Mesfin Ariaya (P/r) xawisi. Oromiyu Qoqqowira qara gobboomu amaalamme songo beeqqo assitannori 320 ikkitanno riqiwamaano doorantannota qummi assino.
Gobboomu amaalame komishiine qaru komishiinerchi Mesfin Ariaya (P/r) Oromiyu Qoqqowi sirnya gamba assate amaalammete fooliishsho faajjetenni hanafantu woyte assino afii fa’note hasaawinni xawisinonte gede; amaalamme Itophiyaho sufino keere geisate mixo assidhinote. Kiphotenna nyekkeerammete iillishshannonke mitiimmubba luqqinse fushshatenni tiro hasate dhaggete bareeti.
Itophiyaho babbaxxitino dagate bissa, hedote massagaanonna poletiku massagaano mereero leellitannoti sumimmete hoonge addinta qara ikkitino gobboomu hajubba aana illachishshannota ikkase qummi asse; xaa geeshsha mitiimmubba tirate ha’noonni doogga suffino tiro abba hoogansanni gobbanna daga bushshino gawajjora iillishshanni noota coyi’rino.
Suffinonna hasiissanno tiro abbate baala gamba assitannotanna beeqqisiissannota gobboomu amaalamme assatenni sumimmete aana iillate komishiine uurrisamase qaagiissino.
Komishiine gobbate garinni noo sumimme hoongeranna hedote badooshshira kaima ikkitinori addinta hasiissannonna gobboomu sirnyoota suudisannota coyi’rinohu qaru komishiinerchi; amaalammetenni sumimmete aana iillinanninsa gede assatenni gumulonsano mitteenni buuxo assannota leellishino.
Sadaada 7 / 2017 M.D hananfe honse harunsitino barrubbara Oromiyu Qoqqowira ha’rinsanni afammanni sirnya gamba assate barera komishiine Oromiyu Qoqqowi sirnyoota gamba assitannota xawisinohu qaru komishiinerchi; qara gobboomu amaalamme songora Oromiya riqibbe beeqqitanno riqiwamaano doorantannotano coyi’rino. Honse barrubbara assinanni sirnya gamba assate hasaawi barenni qoqqowo riqibbe qara gobboomu amaalamme songo aana beeqqaano ikkitannori 320 riqiwamaano doorantannotaati xawisinohu.
Lame fooliishshuwanni assinanni barenni umikki fooliishshora 356 woraddanni filantinori lamalu kumi ali dagate riqiwamaano beeqqitannota leellishe; layinki fooliishshora dagate riqiwamaano; babbaxxitinori hajo la’annonsa bissa, gobboomahonna qoqqowoho millissanno poletiku paartooti, uurrinshuwatenna maamarrate riqiwamaano, maccarenna affantinore ikkitinori jawu qeechi hallanyootinna sasenti mootimmate bissa beeqqo assitannota xawisino.
Oromiyu sirnya gamba assate amaalamme fooliishsho jeefisanturo gattannori Amaarunna Tigirete qoqqowubba calla ikkansa qaagiissinohu qaru komishiinerchi; kunino woradu deerrinni sirnyu gambooshshi jeefisaminonsa woradda 615 nni 791 widira gotti assannosita qummeessino.
Tini bare Oromiyu Qoqqowi beeqqaano sumimmiweellete korkaata ikkitino mitiimmubba luqqise fushshatenni mitiimmubba tirranni gara hassinanni dhaggete bareeti yinohu Mesfini Ariaya (P/r) beeqqaano gobboomu horo noonsa sirnyoota qummi assatenni amaalammetenni hedonsa uytanno gede woshshatto shiqishino.
Demmellash Demmeqe
Bakkalcho Sadaasa 10, 2017 M.D
