Daraara:- Daraaru woradira 6 agani giddo 366 qansootira loosu kaayyo kalanqoonnita Daraaru woradi xawisino. Qansootaho loosu kaayyo kalaqate mitte miliyoone ali birra beenkoonni.
Daraaru woradi qaru gashshaanchi kalaa Lexxefe Laanchehu Itophiyu pireesete uurrinshara xawisino garinni; woradaho qansootaho 6 agani giddo loosu kaayyo kalaqate 1 miliyoone 254 kume 420 ikkitanno liqoo shiqishate mixo amande xaa geeshsha 1,018.880 birra shiqisha dandiinoonni.
Leewu agani giddo jajjabba Yuniversitubbanni maassantinorenna wolootta looso hasidhanno qansoota fila dandiinoonnita buuxise; xaa geeshsha 366 qansootira loosu kaayyo kalanqoonni yiino.
Loosu kaayyo kalanqoonni handaarubba qarunni giwirinnanna, owaantete handaarubbanni ikkitinotano xawisino.
Konne wedella loosu widira bobbaasate 1 miliyoone ale ikkanno birrano liqiissinoonnita xawisinohu gashshaanchu; konni giddonni 968 kume 439 ikkanno asale qolsiisa dandiinoonnita buuxisino.
Kalaa Lexxefe, Daraaru woradira wedellu mootimmate mine qaxaramate hedonni fulte uminsanni looso kalaqate noonsa hixamanye lexxitanni dagginota qaagiisse; konninni gumu maareekkamanni no yiino.
Giwirinnu widoonni loosu kaayyo kalanqoonni weddellirano honse heektaare ikkitanno baatto shiqisha dandiinoonni yiinohu qaru gashshaanchi; gaashenna woloota gide qasiisotenni loossanno gede assinoonnita xawisino.
Wole widoonni woradu goyrete yanna loosono loosanni nooha ikkanna; qara qara ikkino gidinni 4 kume 708 heektaare baatto dooramino wixinni diwa dandiinoonni yiino.
Daraaru woradi goyrete yanna loosinni wahe, maxaaxeessa, dinnicha, akuri atera, gaashe, weesenna gati kaayishshi laalchinni laashshate hala`ladunni loossanni noota buuxisino.
4 kume 708 ale heektaare baatto aana winxoonni gidinni afi`nannihu xaphoomu laalchi batinyi 2 xibbe kume ale ikkannotano coyi`rino.
Laalchonna laalchimma lossate dooramino wixa horoonsi`ra qara guulcho ikkanna; baxxinohunni wahetenna gaashete dooramino wixa danchu garinni horoonsi`noonnita buuxisino.
Hattonni bushshu shiilo woy madaabbaru waacono yanna agadhino garinni shiqinshoonniha ikkanna; NPS madaabbara 2 kume 708 kuntaala shiqisha dandiinoonnita kule; sunfe gaashete loosira ikkanno yuuriyu madaabarano 289 kuntala ikkannoha dagate iillisha dandiinoonni yiino.
Kaa`lamooshshu innisheetiive yinannitenni woradu giddo anga ajjino daga irkisatenna woluwiichi irkonni fulate hattono meessinni umo dandaate fano baatto noowa baala gidunni diwate mootimma illacha assite loossanni noota kalaa Lexxefe qummeesse; tenne yannara 25 heektaare ikkitannota fano baatto gaashetenninna wahetenni diwa dandiinoonnita coyi`rino.
Abrahaam Saamueel
Bakkalcho Sadaasa 10, 2017 M.D
