– Jajjabba latishshu pirojekitubbano maassantino
Addis Ababa:- Dagannita latishshu xa’mo dawarate dandiisiissanno haammata latishshu pirojektubba loosantanni afantannota Sidaamu Qoqqowi Pirezidaantichi Desta Ledamo coyi’ri.
Sa’u muli barrubba giddo Wodiidi Sidaami zoonera babbaxxitino woraddanna quchummara ijaarantino latishshu pirojektubba Qoqqowu pirezidaantichinna woloottuno jajjabba mootimmate loosu massagaano afantinowa maassante owaantete fano ikkitino.
Maassantino pirojektubba mereerinni Alatta wondi xaphooma Hospitaale xaginaatu uduunni, zoonete gashshooti borro mini ijaari hattono lame balaxote rosi minna afantanno.
Pirojektubba maassi’re owaantete fano assinohu Pirezidaanrichu Desta Ledamo coyi’ranni; latishshu xe’ne wonshate dandiisiissannori haammata pirojektubba mootimmatenna dagate halammenni ijaarantanni afantanno yiino.
Pirojektubbannihu xaphooma woxu fulo 98.5 miliyoone birra ikkanna; mootimmatenna dagoomu beeqqonni diwantinota ikkase kulloonni.
Dagoomaho duuchu handaari owaantenna horo uytanno latishshu pirojektubba halashshate mootimma jawa illacha tugge loossanni afantannotano coyi’rino.
Pirojekitubba harancho yanna giddo jeefisanna dagooma horaameeyye assa jireenyu harumaati yaanniiti lede xawisinohu Pirezidaantichu.
Tenne yannara Pirezidaantichu Desta Ledamo Alatta wondi xaphooma Hospitaale halashsho ijaarshi safote kinchono worino.
Hospitaale konni albaanni umi dirimi deerrinni owaante uytanni keeshshitinoha ikkanna; muli yanna kawa xaphooma Hospitaale widira lophitinota ikkasenni; xa noo deerinni addi addi Ispeeshaalite owaante uytanno gede dandiisiissanno halashsho assinannita maassote amuraati aana kulloonni.
Wole widoonni, Alatta Cuukkote woradira Dongori olliira ijaarroonnihu xalalu anganni way pirojektenna balaxote rosi mine; Dibbichu olliira ijaarroonnihu xalalu anganni way pirojekite hattono Alatta Cuukkote quchumira ijaarroonni Yoote mininna poolisete borrote mini maassamino.
Qoqqowoho yanna yannantenni dagoomu kayisanno safote latishshubba mereerinni xalalu anganni way, caabbiichunna doogote latishshubba qaruudde ikkitanna; qoqqowu mootimma dagate xa’mora addi illacha aatenni pirojekitubba hanafatenni calla ikkikkinni harancho yanna giddo jeefisatenni dagooma horaameeyye assa dandiinoonnita kulloonni.
Tennerano sa`u yannubbaranna techo maassiinsoommorinna looso hanafisiinsoommori naqaashete yiino pirezidaantichu.
Pirezidaantichu ledeno qoqqowu mootimma duuchunku handaarinni ka`inota dagate xa`mubba dawarate assitanni noo wo`naalshinni baalanka beeqqaancho assitanno dagate millimillo kalanqoonnita xawisino.
Konninni, qoqqowoho afantannoti mootimmate loosaasine, hallanya uurrinshuwa hattono danchummate fajjo owaantenni bobbakkino hallanyootinna qooxeessu dagoomi qeechansa fulatenni malaatensa wortino yiino; Pirezidaantichu.
Qoqqowu mootimma latishshu woshshattora wiinamu dawaro uytino bissara galatasi xawisinohu pirezidaantichu; aanteteno daganniha latishshu hasattubba garunni wonshate mannu aana illachishshino owaantenna horo uytanno uurrinshuwa kalaqate kaajjado sharro assinannitano egensiisino.
Wodiidi Sidaami zoonera Alatta Cuukkote woradira Waan Washi pirogiraamenni qoqqowu mootimma ledo qinaawatenni Dongora Qawaado olliira 30 miliyoone fulonni ijaarroonniti xalalu anganni way pirojekite qooxeessaho 12 kume ale dagoomu bissa horaameeyye assitannota ikkase sayinsummo lamalara assinoonni maassote amuraati aana xawinsoonni.
Hattono qoqowu mootimmanni Dibbichu olliira 41.65 miliyoone ale fulonni ijaaroonniti xalalu anganni way pirojekite qooxeessaho 15 kumi ale dagoomu bissa horaameeyye assitannote yinoonni.
Wole widoonni, Alatta Cuukkote quchumi gashshootira Rufo Waaeeno olliira qoqqowu mootimmanni ijaarranni balaxote rosi minira safote kincho worroonni.
Gaazeexu Odeessaanchinni
Bakkalcho Sadaasa 10, 2017 M.D
