Addis Ababa:- Addi nyammo bunu heewo (Cup of Excellency Ethiopia 2024), baatto loosidhe galtinori bunansa kalqete egensiisatenni dikkonsa lossidhanno gede luphiima qeecha godo`lanni afamannota Sidaamu qoqqowi pirezidaantichi kalaa Desta Ledamo coyi`ri.
Tenne lamala giddo addi nyammo bunu heewo (Cup of Excellency Ethiopia 2024) qeelaano ikkitino 40 baatto loosidhe galtinorira afanshu amuraate Hawaasi quchumira harinsoonni.
Amuraatu aana afaminohu qoqqowu pirezidaantichi xawisino garinni; heewo baatto loosidhe galtinori bunansa kalqete deerrinni egensiissanno gedenna hasatto lophitanno gede kaayyo kalaqino.
Tenne heewonni baatto loosidhe galtinorinna handaarunni bobbakkino dureeyye horaameeyye ikkansa xawise; Itophiyahono gobbaydi soorro afisiissinota huwachishino.
Heewotennino Sidaamu qoqqowi islanchimma noosi buna shiqishinota buuxise; bunu laalchimma aana jirsa tunge Sidaamu buni roore jiro abbanno gede loosa hasiissanno yiino.
Heewote aana beeqqitino baatto loosidhe galtinorino miinjansa losi`ransannino aleenni soyaanchimmate widira tareessatenni ledote jiro kalaqidhanni noota coyi`rino.
Itophiyu bununna shaete biilloonyi qaru dayrekiterchi Addunya Debela isi widoonni; bunu laalchi gobbate horo agarsiisa dandaannohu baatto loosidhe galtinori horaameeyyimmansa buuxanturooti yiino.
Sa`u soorrote dirrara gumulote hajo la`annonsa bissa ledo ikkatenni haammata loossa loosantinotano xawisino.
Tenne loossa giddo addi nyammo bunu heewo kullannita ikkitinota xawise; Itophiyu buni kalqete dikko aana bikkunni, islanchimmatenninna eotenni luphi yaanni daanno gede luphiima qeecha fulinota coyi`rino.
Heewote qeelaano baatto loosidhe galtinori buni kalqete deerrinni garafo heewisame luphiima eo afidhanno gede suwashshu garinni gobbaydira sokkanno fajjo afidhe horaameeyyimmansa roore losidhanno gede qoqqowu mootimma ledo loonsannitano egensiisino.
Heewote seyooranna afi`noonni gumira uminsa qeecha fultinota hajo la`annonsa bissano galatino.
Sidaamu qoqqowi irshunna kalaqamu jiro latishshi biiro sooreessi kalaa Memmiru Moke amuraatu aana sayisino sokkanni xawisino garinni bunu gobbate deerrinni ekispoortete laalchinni jawa miinju dhuka ikkinota qummeesse; konnirano Sidaamu qoqqowi bunu laashshaano baatto loosidhe galtinori, shiqishaano, soyaano, halamaano uurrinshuwa qeechinsa luphi yinoha ikkinota huwachishino.
2016 addi bunu nyammo 40 qeelaanonni 34 bunu laashshaano Sidaamu qoqqowinni ikkansano buuxisino.
Qoqqowoho xaa yannara bunu laalchimma hekitaaretenni 11 kuntaala ikkinota buuxisinohu sooreessu; tenne bikka 15 kuntaali widira iillishate mixotenni loonsanni hee`noonni yiino.
Amuraatu aana afanshsha uyinoonninsa 40 baatto loosidhe galtinori mereerinni 90 anga xibbuunni ali gumulshi noonsa lame qeelaanora boowete baraarsha baraarsinoonniha ikkanna qeechansa fultino hajo la`annonsa bissarano afamishsha uynoonni.
Abbebech Maatewoos
Bakkalcho Sadaasa 10, 2017 M.D
