Addis Ababa:– Arbamincete quchumi bocaasa 29/2017 MD Federaaletenni xaphoomu ministiricha Abiy Ahimed (Dr) lendanna luphiima massaganonna Itophiyunnita duuchanta daga riqibbino daga dagoominna qoqqowubbate massagaano noowa ayirrinsoonni.
Ayyaanu barera Arbamincete leellinohu IFDR xaphoomu ministirichi Abiy Ahimed (Dr) sayisino sokkanni; hallanyunna mittu qooxeessi hasattonna halchonni roore Itophiyu jireenyiranna mittimmara mitteenni uurra ayirrinyeho yiino.
“Ninke Itophiyu daga mitteenni uurrinummoro biifadonna jawaata ikkineemmo; meessinna mittu qooxeessi halchonna hasattonni roore Itophiyu jireenyiranna lophora mitteenni uurra ayirrinyeho.” yaatennino qummeessino.
Mittimmanke hiittoo garinnino hoshoonsheemmokki daga ikkino yinohu xaphoomu ministirchi; ledamate hedonni dagatenna dagoomu ayyaaninni mitteenni uurrate baalunku qansichi muranno gede xa’mino.
Itophiyu daga anfe digundoommo yinohu xaphoomu ministirchi; Itophiyu hanqafo giddo gutu dhagge, gutu budi, gutu raggenna gutu kakkalamaanchimma heerase xawisino.
Hidhitanno hedo bowirsatenni dagatenna dagoomu mittimma roorenkanni kaajjisha hasiissannota xawise; fakkanimma Itophiya gatamaratenna kaajjishate dagatenna dagoomu barra ayirrisa qeechise luphiima ikkaseno kayisino.
Itophiyu jawu maxaafi gedeeti yinohu xaphoomu ministirchi; giddosi haammata bude, hornya, egennonna hayyo afantannota qummeessino. Mittu maxaafi callisi wo’ma ikkannokkinte gede Itophiyu daganna dagoomi mittimma bowirsatenni foonqe wonsha dandiitannota huwachishinno.
Itophiyu xorshante gooffannokki baara ikkasenni; hilicci egennonni murantenni roore gamba yine xiinxalla, buuxanna afa hasiissanno yiino.
Wodananke keerunniwa qolatenni Itophiya roorenkanni jiroo’misate gutunninna halamatenni loonso yinohu xaphoomu ministirchi; Itophiyu kalaqaanchu shaqqillinna qansootise sharronni hanaffinoha jireenyu hodhishsha guma gansiissannota egensiisino.
Xaphoomu ministirchi sharrete, gaancete, olunna gibbote qodho tirre Itophiyu keeriranna lophora mitteenni loosa hasiissannota huwachishinno.
Muli yannanni Oromiyu qoqqowira qodhaano olunninni keeru woyyanno yite keerunniwa daansa kaysinohu xaphoomu ministirchi ; tenne dancha hanafo Oromiyu, Amaarunna wolootu qoqqowubbara afantanno qodhaano roduuwi harunsitanno gede woshshatto assino.
19ki dagatenna dagoomu barra wodiidi Itophiyi qoqqowira Arbamincete quchumira iibbadu garinni ayirrinsoonniha ikkanna; aanino diri 20ki dagatenna dagoomu barri ayyaana qixxeessaanchu qoqqowi mereerimu Itophiyu qoqqowo ikkinota buunxoonni.
Qiddist Gezzaheny
Bakkalcho Sadaasa 3, 2017 M.D
