– 16.2 miliyoone kuntaala gamba assate mixi`noonni
Addis Ababa:- Sidaamu qoqqowira arri gorsinni lamente doyichonni xaphooma 72 kume 892 hekitaare baatto lattannota irshunna kalaqamu latishshi biiro egensiissu.
Qoqqowu Irshunna kalaqamu latishshi biiro komunikeehiinete dayirekitoreete dayirekiterchi kalaa Geetaachew Kebbede Itophiyu pireesete uurrinshara xawisino garinni; arri gorsi millimmo laalchonna laalchimma lossate dirunni sasenna shoole marro loosatenni maatete jireenya buuxisiisate assinanni sharrora jawu qeechi noosi.
Arri gorsinni 16.2 miliyoone ale kuntaala gamba assinanni yine agarranni yiinohu kalaa Geetaachew,konnirano 312 kume 755 baatto loosidhe galtinori beeqqitanno yiino.
Konne jeefisate qoqqowunni kayise zoonnate, woraddatenna olluubbate qoqqowu pirezidantichinni massagantino millimmote bare harinsoonni.
Arri gorsinni Hawaasi gaangaawiranna Lokka abbaayyu woradira hattono wolootta woraddara qamadete laalcho latisate mixi`noonnita xawisinohu dayirekiterichu; hala`ladunni kayinni Hawaasi gaangaawiranna Lokka abbaayyu woradira mekanayizeshinetenni latinsannita buuxisino.
Dayirekiterchu, qoqqowoho roore anga gati atikiltenna laalote gumma hala`ladunni lattannota kayise; 142 kume 904 hekitaare ikkitanno baatto aana gati atikilte latisate mixi`noonnita egensiisino.
Baatto loosidhe galtinori gorsu latishshi daafira noonsa huwanyo yanna yannantenni lexxitanni dagginota coyi`re; tini hayyo woxe afi`nanninna sagaletenni meessaneeto dandiinannita ikkasenni bashsho xeena agartanni laashshitanno daga xaa yannara dirunni sasenna shoole marro laashshitanni afantanno yiino.
Qoqqowu mootimmano addi illacha aatenni baxxinohunnino woraddate gorsu pirojekitubba ijaarsatenni hattono baatto loosidhe galtinori babbaxxino waayi doorshubba horonsidhanno gede assatenni irkissanni noota xawisino.
Ikkolla ikkinnina baatto loosidhe galtinori uminsa yannanni uminsata waayi buicho qixxeessidhe laashshitanno deerra iillinoonnitano kaysino.
Qoqqowoho afantanno baatto ruukkado ikkasenni hala`lado irsha mekanayizeshiinetenni laashsha hooga mitto qarra ikkitinota hattono batinyunni cucculo baatto laashshinannita coyi`re; Hawaasi gaangaawira, Lokkabbaayyaho, sa“e sa“e Daallenna Malga woradira mekanayizeeshiinetenni horonsirate rosichi noohura albillicho halashshate mixi`nannitano xawisino.
Baatto loosidhe galtinori mittu dani laalcho laashshitannokki gede assate mixotenni massanganni hee`noonnita buuxise; woradu woradunkunni addi addi laalcho laashshidhe dikko fushshidhanno gede assate looso gumullanni hee`noonnitano xawisino.
Konni ragaanni niri keeno dancha guma leellishshanno yiinohu dayirekiterchu kalaa Geetachew; konni gedensaannino afi`nanni laalcho ledatenna nirihunni woyyino guma abbate harunsonna irko kaajjinshe sunfannita coyi`rino.
Laalchonna laalchimma lossate baatto garunni hawuura, duuchanta waaco horonsira hasiissanno yee; baatto loosidhe gltinori hasidhannohu dooramino sirchi anje xaaddannokki gede qoqqowu mootimma illachunni massagganni afantannota buuxisino.
Amadisiiseno, NPS 28 kume 226 kuntaala, yuuriya 28 kume 226 kuntaala hattono 75 kume 756 kuntaala dooramino sircho baatto loosidhe galtinorira shiqishate mixi`noonnita egensiisino.
Abbebech Maatewoos
Bakkalcho Sadaasa 3, 2017 M.D
