Addis Ababa: Juntu hanafinoha hunote assoote woxunninna mashalaqqe aatenni irkissanni noore 13 mannoota amandoonnita Sidaamu qoqqowi keerunna ga’labbote biiro egensiissino.
Biiro assitino harunsonni mite mite Hawaasi quchumi teesaano ikkitinori cancishaano HWHT hanaffinoha gobba diigate assoote woxunninna mashalaqqe aatenni kaa’litannota assinoonni harunsonni buuxa dandiinoonnita buuxissino.
Biirote sooreessi kalaa Alemaayehu Ximootiwoosihu baxxinohunni Bakkalcho Gaazeexira xawisino garinni; amadantino mannooti harancho yanna giddo kaima anfoonnikki jiro kalaqidhinorenna albi gargarooshshu massagaano ledo kaajjadu xaadooshshi noonsare ikkansa assinoonni harunsonni buuxa dandiinoonni yino.
Baxxinohunni albiri gargarooshshu massagaano horonsidhanno minna kuri mannooti kiraho uyte woxe gamba assite sokkanni keeshshitinota iilline buuxo assinanni hee’noonniha ikkanna insano seeru hundaanni afantannota sooreessu lede xawisino.
Ledoteno qoqqowoho Bilaattenna Siraaro woradda mereero kipho kalaqate wo’naaltinore 27 huluullamaano amandoonniha ikkanna kaphu woxe attamatenninna seeriweelo woxu doychonni huluullammoonnire sase huluullamaano 186 kumi Ameeriku Doolaare ledo amandoonnita biirote sooreessi kalaa Alemaayyehu uurrinshinkera xawisino.
Quchumaho Tigrayete ilama ikkitino teesaano ledo halamme loosate duucha hinge hasaawa assinoommo yinohu sooreessu; halaalaancho mashalaqqe aatenni ledonke noori nootanna hattono gurchunni quchumu teesaano ikkite Juntu hanafino assootira kaa’lo assitannori hee’ransa bande wolootu Tigrayete ilama ikkitino dagara xawo assinanni hee’noommo yino.
Konni gobbaanni batinye sagalete horonsi’nanni uduunne magaazinete duunte canco kalaqate, laalchu anje kalaqantanno gede assitinorenna hasiisannokki waaga leddino daddalaano hee’ransa buunxe; duuntino laalcho fushshite hirtanno gede baalante woraddaranna sinu quchummara hedo kalaqatenna seera agarsiisate looso loonsanni hee’noommo; ledoteno kaphu duduwo fincatenni daga hembeelsitanno daddalaano hee’ransano buunxoommo yino kalaa Alemaayehu.
HWHTnna Shene albano ikkiro su’minsa babbaxxo ikkinnina loosinsa mittoho yinohu biirote sooreessi; xaa yannara cancu assootensa gumulate mitte hedonni waaxantinohu jeefote yannaraati yee ammanannota xawisino. Tenne wolqa mixo diigatenni gobbate keeraanchimma sufisiisa dandiinannihu mitte hedonni kaajjine sharrama dandiiniro calla ikkinota kaysinohu kalaa Alemaayyehu; kuri gobba diiigate sokko amaddino wolqa higge ka’annokki gede hegerera hunate gobba assitanni noo sharrora mittu mittunku umisi qeecha fula hasiissannosita huwachishinno.
Jeefoteno daga injiitinokki yanna giddoonni heedhe gargarooshshu olantora assitanni noo woxunna danu irkora galatasi shiqishe; hananfoonni sokko jeefanta geeshsha daganke aantetenni heedhara dandiitanno gobbate woshshattora assitanno kaa’lo suffanno gede sokkasi saysino.
Qiddist Gezaheny
Bakkalcho Woxawaajje 27/ 2013 M.D
