Addis Ababa:– 19ki Daganna dagoomu barra Sidaamu qoqqowi deerrinni tenne lamalara ayirrinsoonni.
Ayyaanu sa’u muli barrubbara baalante qooxeessubbara deerru deerrunkunni ayirrisamanni keeshshinoha ikkanna qoqqowu deerrinnino ayirrisamino.
Ayyaanu amuraati aana Qoqqowu Pirezidaantichi Desta Ledamo coyi’ranni; duucha dagooma ikkanke roduuwimmankenna mittimankera xintaho yiino.
Konne barra ayirrinseemmo woyte haammatu qansooti lubbanteenna hegertino gobba mittimma agarsiinse aantanno ilamara tareessa hasiissannotano qummeessino.
Itophiyu duucha daganna dagoomi gobba ikkasenni daganniha babbaxxino budenna balchooma hattono hornyubba mittimmate afantannowa utuwa gobba ikkase kulino.
Qoqqowu Amaale mini songaafitte Faantaye Kebbede ise widoonni; qoqqowoho tayxeha daganna dagoomu barra ayirrinseemmo woyte Sidaamu qoqqowo ikke umosi gashshatenni seeru aliidimma agaranteenna; hattono daga duuchunku handaarinni horaameeyye ikkitanno gede loonse naaxxissanno gumma maareekkisiinsoommo yannara ikkasi hagiiriissannote yitino.
Gaazeexu Odeessaanchinni
Bakkalcho Bocaasa 26, 2017 M.D
