Addis Ababa:- Jireenyu paarte safantinoha 5ki diri ayyaana xaphi assate amuraate Addis Ababaho Adiwu qeelle qaaggooshshi harira ayirrinsoonni.
Tenne yannara hasaawa assinohu paartete pirezidaantichinna IFDR Xaphoomu ministirchi Abiy Ahimed (Dr); Jireenyu paarte dagate hasatto wonshate; seeda yannara rumuxxite keeshshitino dagate xa’mora dawaro qolatenna baalanka beeqqaano assate; hattono dimokiraasenna jireenya adda assate hendeenna safantinota ikkase kaysino.
Sa’u lee dirrara quchumaho ikko baadiyyete duuchunku handaarinni illete leeltanno soorronna gumma maareekkinoonni loosi gumulaminota coyi’rino.
Paartenke buximatenni ukkitino gobbuwa hiittoonni loosse woloottu kaa’lonni hee’ratenni fulte haxonsa gotti assanna umonsa dandiitannoro lawishsha ikkitinote yiinohu paartete pirezidaantichi; sa’u lee dirrara duuchu handaarinni seyoo maareekkisiisa dandiinirono jiffa dixaaddino yaa dikkino. Kayinnilla, xaaddinota baca jiffa sa”atenni seyoote widira soorra dandiinoonni yiino.
Jireenyu paarte sa’u soorrote dirarra ha’nura miinju woyyeesso assatenni, gibrinnu, Industirete, dipilomaasete, farcote uurrinshuwanna wolootta handaarrannino daggino seyoore ledote haanju haruminni, maatete jireenyinni, arri gorsu latishshi loosinni, Itophiyu laashshito yaannohunni hattono quchumu koriiderete latishshi loossanni maala’lissanno seyoo maareekkisiisa dandiinoonnita kaysino.
Pirezidaantichu coyi’rino garinni; jireenyu paarte halchonna hasattonke dagankera leellinsheemmote. Paartete ajuuja guuta ikkino garinni gumula dandiinanni woyteno qansootu horaameessimma lophitanno. Paarte pirezidaantichi; xaa yannara 15.7 miliyoone miilla noosetanna Afrikaho jajjabba paartuwanni albisa ikkitinota xawisino.
Amsaalu Felleqe
Bakkalcho Bocaasa 26, 2017 M.D
