Addis Ababa: Gobbankera wiinamunni hala`lanni afamannoha kovidi-19 fayya taraawo halamme gargadha hoongiro waaga baatisiisara dandaannota Addis Ababu quchumi gashshooti fayyimmate biiro sooreessi Dr Yohaannis Chaalihu xawisi.
Dr Yohannis baxxinohunni Itophiyu preesete uurrinshara xawisino garinni; sa`u shoole lamalara kovidi-19 fayyanni amadamate bikki, quuxxotenni xissamanno manni kiiro hattono xissotenni lubbonsa hoogganno manni kiiro lowo geeshsha lexxitino.
Hajo la’annonsa bissa baalanti halante taraawo gargadha hooguro xisso Itophiyaho luphiima waaga baatisiissara dandiitannota xawisinohu Dr Yohaannisi; fayyate taraawo mitiinsitannota ikkase huwatatenni baalunku hajo la`annonsa bissa hajajo loosu aana hosiisatenni yawonsa fula noonsata huwachishino.
Ledoteno assinannihu balaxote qoropho agaramino gede hee`reennanni taraawo gargadhate mittenna qara doogo kovidi-19te kittiwaate adhate yinohu Dr Yohaannisi; mittu aganni yanna giddo 1 miiliyoone ikkitanno qansoota kattawate gaadi hanafinota, kittiwaateno baalante mootimmate
fayyimmate uurrinshuwara afantannohura hiikkuno dirisi 35 ale ikkinosi qansichi baatooshshi-weelo adha dandaannota egensiisino.
Abebech Maatewoos
Bakkalcho Woxawaajje 20 , 2013 M.D
