Sa’u shoole dirra giddo Itophiyu pireesete uurrinshara attammannihu Bakkalcho gaazeexi dagatenna mootimmate mereero mitto mashalaqqete buusa ikke keeshshinota xawinsi.
Bakkalcho gaazeexi Itophiyu pireesete uurrinshara attamama hanafinkunni shoole diro guute ontikki dirira reekkamino.
Hajote aana Itophiyu pireesete uurrinsha ledo hasaawa assinohu Sidaamu qoqqowi komunikeeshiinete biiro sooreessi kalaa Woseniyelleh Simioonihu coyi’ranni; Sa’u shoole dirra giddo qoqqowu giddo gumullannita addi addi latishshu loossa dagate niwaawetenni mashalaqqisate widoonni bakkalcho gaazeexi luphiima qeecha fulanni keeshshinota buuxisino.
Sooreessu ledotenni; kalqe dijitaale hayyo harunsitanni noo yanna aana hee’noommoha ikkirono uurrinsha qoqqowoho woraddate geeshsha dirrite dagate giddo noota babbaxxitino mashalaqqe niwaawetenni qineessite shiqishshanni keeshshitinota kayisino.
Mootimma gumultanno looso dagate mashalaqqisate tuqu xaadooshshi qeechi luphiimaho yinohu kalaa Woseniyellehi; baxxinohunni qoqqowu giddo noo keere wole daga affanno gede dandiisino; Konninnino Sidaamu qoqqowi wole qoqqowubbanni keerunni lawishsha assine adhinanniha ikkasi tuqu xaadooshshi gumaati yino.
Bakkalcho gaazeexi mitto soorrote gumaati yinohu biirote sooreessi; Gobboomu mashalaqqe gobboomu uurrinshara attamante niwaawete shiqase Sidaamu daga lubbote heedhe la’’ate halchinanni hajubba giddonni mittete yee tinino naaxxisiissannota ikkase coyi’rino.
Aanteteno sa’u yannara noo foonqe keenne, qoqqowu giddo noo handaarubba ledo halamatenni qinaambe ha’ra hasiissannota huwachishe; baxxinohunni Sidaamu daga seeda dirra dhagge mashalaqqisatenna dhaggete borreessine amadatenni, qoqqowu mootimmano konnira hasiissanno injoo kalaqatenni jawaante sufa hasiissannonke yino.
Konni gobbaanni Sidaamu afii Bakkalcho gaazeexinni ledote wole gobboomu xiiwo kalaqqanno tuqu xaadooshshuwara loosamanno gede dandiisa noonke yino.
Jeefoteno sokkasinni Sidaamu daga lophate kaayyo jawate; sa’nummo shoolu diri giddo daggino soorrono shiima di ikkitino. Konni daafira qoqqowu giddo noo keerenna latishshu injoo Itophiyu daganna kalqe affanno gede tuqu xaadooshshi kaayyo kalaqino. Kuni kaajjinshe loonsoommo loosinni dayino guma ikkasi xawise, aantete konni aleenni kaajjinshe sufa ninkewinni agarantannote yino.
Hattono wole gobbuwanni rosicho adhine loosa hasiissannota huwachishe; tuqu xaadooshshuwanna handaaru bissa mootimmatenna dagate mereero buusa ikkine loosa hasiissannonke yaanni huwachishinno.
Qiddist Gezzaheny
Bakkalcho Bocaasa 12, 2017 M.D
