Daayye:- Daayye quchumira saihu 2013M. Dra 2kume, 740 looso hooggino wedellira looso kalaqate hende 2kume, 643 wedellira loosu kaayyo kalaqa dandiinoonnita quchumu gashshooti kantiiwi Kalaa Mekuriya Mershayehu egensiisi.
Kalaa Mekuriya Mershayehu, baxxinohunni Itophiyu Pireesete Uurrinshara xawisino garinni; wedellaho loosu kaayyo kalanqoonnihuno quchumu giwirinninni, konistiraakshiinetenni, owaantetenna industirete handaarinni ikkinota coy’rino.
Kuri mereerinnino addi addi pirojekittuwara 1,902 ikkanno wedellira yannate geeshshi loosu kaayyonna 741 wedellira uurrinshate loosu kaayyo kalanqoonni yee; konninnino yannate geeshshi loosu kaayyo kalaqo mixote aleenni gumulantinota xawisino.
Kuri wedella 74 maamarranni tantanatenni diru giddo 3 bixxille 1 miiliyoone birra gaamme quchumu wedella loosu giddora eessa dandiinoommo yino.
Quchumaho looso hasidhanno wedella badatenni kayse qajeelsha uyne loosu giddora eessate harancho yanna giddo kageeshshi looso loonsoommohano ikkirono yannate geeshshi loosi kaayyo kalaqoonni wedella uurrinshaamu loosi widira abbate ragaanni xe’ne no; konneno haaru baajetete dirinni taashshate kaajjinshe loonsanni hee’noonni yino.
Loosu kaayyo kalaqate widoonni wedellu laooshshi jifo ikkinonsa gedeno kaysinohu Kantiiwu; wedellu baalu mootimmate loosu gollara calla qaxaramate hasatto noonsata qummi asse; hiitti gobbano lophitinohu manna mootimmate dargira calla qaxarte ikkinokkita huwachishe; wedellu techo manaadda loossanni tantanante ga’a wole qaxartannore ikkitannori insa uminsa qaxarammeemmolla yaansa huwanyootu anje ikkitinohura wedellaho rosu minnanni kayinse loosa hoongiro maassame dayiha baala mootimmate loosira calla qaxarranni aante noo garinni qarra tidha didandiinanni yino.
Kalaa Mekuriy amadisiiseno; quchumu wedellira loosu kaayyo kalaqate ragaanni xaadinonkeha laooshshu qarra taashshate gashshootu jawa illacha tuge loosanni noohano ikkiro maatensano ikkito dagoomu wedellu uminsa wolu wiinni lawishsha adhite konni handaarira bobbahate qixxaabbe dagguro quchumu gashshooti hasiisanno garinni loosu giddora eessate qixxaawinota xawisino.
Konni handaarira hasiisannoha wedellu loosidhannowanna laashshitinoha dikkote shiqishidhanno darganna liqoote woxe ikkadu garinni shiqishate widoonni leeltanno foonqe aantete tirranniha ikkitinotano qummi assino.
Addisu Adoola
Bakkalcho Woxawaajje 20 , 2013 M.D
