Addis Ababa:- Diru dirunni Bocaasa 29 ayirrinsannihu dagatenna dagoomu ayyaanni budensa soorriratenni demokiraasitte mittimmansa kaajjishidhanno gede ka’lannota Federeeshinete amaale mini egensiisi.
19ki Itophiyu daganna dagoomu barri ayyaani Federeeshinete amaale mini qineessaanchimmanninna Wodiidi Itophiyu Qoqqowi koyishshinni ‘’Gobboomu sumimme dagoomu mittimmara’’ yaanno uminni Arbaamincete quchumira babbaxxitino qixxaawubbanni ayirrisamanno.
19ki Itophiyu daganna dagoomu barri ayyaana ayirrinsanni gara lainohunni Federeeshinete amaale mine mootimmubbate xaadooshshi, demokiraasete mittimmanna bayriidi seeri rosiishshi uurrinshu komite borreessaancho baabba Baanchiyirga Mellese gaazeexu xawishsha uyitu yannara xawissino garinni; ayyaanu diru dirunni ayirrisamasi xaanna konni ka’i ilamara dagate mittimmanna kaajjado xaadooshshe kalaqate baca horo noosi. Ayyaanu aana daganna dagoomu budensa soorriratenni demokiraasitte mittimmansa kaajjishidhanno gede assanno yitino.
Dagatenna dagoomu barri federaalete amanyoote kaajjishannohu bitimu odeessiishshi luphi yaanno gede kaa’lanno yitinoti baabba Baanchiyirga; yanna hiitte yannannino aleenni mittimmanke kaajjishi’neemmote yitino. Keerenke kaajjinsheemmota, mittimmanke rummuxxitanno gede jawaanteemmote; konnira qole, ayyaanu ayirrisamme demokiraasitte mittimma kaajjishate hasiissannota ikkase xawissino.
Ayyaanu ayirrisamanno woyte gobboomu mittimma kaajjishanno garinni federaalizimetenna bayriidi seeri rosiishshi loosi loosamanno yitinoti baabba Baanchiyirga; keeraancho sharro xawishsha ikkinoha amaalamate, kaa’lamate, hedote aliidimmanni hasaawatenna mimmito macciishshate illachunni loonsannita qummi assitino.
IBorreessaanchote xawishshi garinni; Ayyaanu sufatto noosi keeri hee`ranno gedenna ikonoometenna dagoomitte lopho rakkanno gede kaa’lanno. 19ki ayyaanira bayiriidi Itophiyu haroo’mate kofatto mimmitu mittimmanke haruma leellishshannota ikkasenni kofattote assinanni irko kaajjite suffannota ikkitanno. Itophiya haaro dhagge fooliishshowa tareessate dagate mittimma noose waaga huwachishanna mittimmate balchoomubba lophitanni hadhanno gede dandiisiissanno loossa gumulantanno.
Sa’u 18 dirrara ayyaanu ayirrisamanno woyte haammata gumma borreessantino yitinoti borreessaancho; daga seeda dirrara amaxxite keeshshitino mittimmansa kaajjishshanno gede, bayriidi seerinna federaalete amanyoote lainohunni huwanyo heedhannonsa gede dandiisino. Hattono mimmitu ledo egennamatenna budu xaadooshshi bare ikkitanno gede injiino akati kalaqamino yitino.
Borreessaanchote xawishshi garinni; daganna dagoomu mereero tuqimmate aana safantino mittimma rumuxxitannonna lattanno gede assatenni mittimmate lossa ayyaanuwiinni agarranni gumaati.
Dagatenna dagoomu xaadooshshenna mittimma Wodiidi Itophiy qoqqowi koyishshinni Arbaamincete quchumira aantaano onte barrubbanni qixxaabbaanno ikkitubbara babbaxxino su’ma uynoonninsa. Konni garinni, Bocaasa 25 “Rodiimmanniha”, Bocaasa 26 “Mittimmanniha”, Bocaasa 27 “Wodiidi Itophiyiha”, Bocaasa 28 “Amaalammenniha”, Bocaasa 29 “Itophiyu daga barra” yaamamatenni su’mamansa egensinsoonni.
Demmellaash Demmeqe
Bakkalcho Bocaasa 5, 2017 M.D
