Addis Ababa:- Sidaamu qoqqowira 192 KM baadiyyete latishshi koridere loonsanni hee’noonnita qoqqowu doogote latishshinna hodhishshu biiro xawissu.
Sidaamu qoqqowira doogote latishshinna hodhishshu biiro xaadooshshu sooreessi kalaa Desta Danchohu Itophiyu pireesete uurrinshara xawisanni; Sidaamu qoqqowira 192 KM baadiyyete latishshi koriderete looso dagoomu beeqqonni gumullanni hee’noonni.
Gobboomu deerrinni hananfoonni koriderete latishshi millimmonni Sidaamu qoqqowira mixote deerrinni qixxaawo assine loosu giddora e’nanni hee’noonnita egensiise; umikki doyicho baadiyyete latishshi koriderete loosinni wiinamu doogonni baxxinohunni gobba tayisse sa’anno kolishsho doogo noo qooxeessubbaranna qoqqowo wolu qoqqowi ledo xaadissanno doogga aana illacha tunge loonsanni hee’noonnita xawisino.
Konninnino umiti Hawaasinni Dillu geeshsha afantanno wiinamu doogo ikkitanna tinino 80 KM ikkitannota egensiisino.
Hattono Abboostotenni Hula Boore geeshsha noota 46 KM ikkitanno doogonna Hawaasinni Alatta wondo Bensa Daayye geeshsha 66 KM kolishsho doogo dagooma beeqqisiisatenni loonsanni hee’noonni yino.
Konninnino dagoomu hanqafonni doogote qacce maxarate looso hala’ladunni gumullanni hee’noonniha ikkanna; doogote qaccera gamba yite minantino minna diigantanno gede, huxxidhinori kayissanno gedenna Kaasantino haqqe ka’anno gede, giddo doogga fanatenna minna diigate loossa gumullanni hee’noonni yino.
Koriderete latishshi qooxeessu biinfilliranna co’ichimmara, haanju latshshi loosi kalaqamu haqqe qotira kaasate dandiisannoha, qooxeessu dagara heeshsho shotisannohanna yannaasincho assannoha ikkasi xawise; konne kaajjishe sufisiisate qoqqowoho Hawaasi quchuma lendanna shoolente zoonnara millimillote loossa gumullanni hee’noonni yino.
Baadiyyete koriderete latishshi loosi baxxinohunni qooxeessu daga millimmora luphiima qeecha fulannoha ikkasi kayse; konninnino miinju baqqeenya, gongo’mishamaanote millimmora baxxinohunni baadiyyete carete doogo dagoomu mimmitinsa ledo xaadanno gedenna lifixxino millimmo kalaqate dandiisannoho yaanni huwachishinno.
Xaa geeshsha noohu baadiyyete latishshi koriderete loosi dagate beeqqonni loonsanniha ikkinnina mootimma amaddino baajeete nookkita kayse; aantete xaaddotenni mootimmate baajeetenni baalante qarqartora loosate baxxinohunni qoqqowoho gumullanni seedanna carete doogga qooxeessira hanafisiisate mixo amandoonni yino.
Qiddist Gezzaheny
Bakkalcho Bocaasa 5, 2017 M.D
