Addis Ababa:– Gobboomu deerrinni hananfoonnihu dijitaale ayimmate badooshshi pirogiraame gumulama Baankuwa haammata qansoota liqoote kaayyo horaameeyye assitanno gede kaa’lannota Sidaamu Baanke qaru loosu gumulsiisaanchi kalaa Taaddese Haxxiyya xawisi.
Qru loosu gululsiisaanchi Taaddese Itophiyu pireesete uurrinsha ledo assino keeshshonni xawisino garinni; Biheeraawe Baanke wortino ragi garinni mitticho Baanke kaapitaalesenni xibbuunni 25% geeshsha liqiissa dandiitanno.
Sidaamu Baanke kayinni kaapitaalesenni boodu manni callu liqii;rannokki gede assate liqoote bikka 15% assatenni haammata owaatamaano liqii’ra dandiitanno kaayyo kalanqoommo yiino.
Gobbankera afantannoti hiitti Baankeno luphiima woxe ikkinnina 50 kume woy 100 kume birra diliqiissitanno; Sidaamu Baanke kayinni manaaddanna mereerima Interpirayzoota lede baalunku horaameeyye ikkanno garinni liqiissitannota kulino.
Tenne yannarano, baxxinohunni Baankete owaante liqoo afi’ra dandiitannori dijitaale ayimmate badooshshi koodde noonsa owaatamaanooti yiinohu Qaru loosu gumulsiisaanchi; albillichono dijitaale ayimmate badooshshi heerasi Baankuwa jironsanni haammatu qansooti liqoodhanni loosi’ra dandiitanno gede kaayyo kalaqannota qummeessino.
Konnirano korkaatu konni albaanni mittichu owaatamaanchi babbaxxitino ayimmate badooshshe xawissanno kaarde amadatenni addi addi Baankuwanni luphiima woxe liqii’rannohura noo jiro boodu manni calla liqii’ranno. Xa kayinni dijitaale ayimmate badooshshi kaarde woy kooddete kiiro baalante Baankuwara heedhanno daafira babbaxxitino ayimmate badooshshi kaardenni awaawure liqii’ra didandaanno; yaanno qaru loosu gumulsiisaanchi.
Baankuwa liqiissitannohu dagate woxeeti yiinohu qaru loosu gumulsiisaanchi; konnira, dijitaale ayimmate badooshshi gumulama Baankete jiro boodu manni calla liqiidhannokkinna haammatu manni liqii’ra dandaanno gede kaayyo kalaqannota huwachishino.
Ninke mittichu hallanyira 100 miliyoone birra diliqiissineemmo; liqoote kaayyo halashshatenni haammata qansoota horaameeyye assateno manaadda liqooti uyneemmohu yiino. konnira, muli yanna kawa mootimma hanafisiissinohu dijitaale ayimmate badooshshi Baankuwa haammatu qansooti liqoote kaayyo afidhanno gede kaa’lannota lede xawisino.
Amsaalu Felleqe
Bakkalcho Bocaasa 5, 2017 M.D
