Addis Ababa:- Hawaasi quchumi giddo loosamanni noohu koriiderete latishshi quchumu turizime millimmora injiino akata kalaqannoha ikkasi Sidaamu qoqqowi doogote latishshinna hodhishshu biiro egensiissu. Quchumaho lee bixxille lamala kiilo meetire koriiderete latishshi loosamanni no.
Sidaamu qoqqowi doogote latishshinna hodhishshu biiro komunikeeshine massagaanchi kalaa Desta Dancho Itophiyu Pireese Uurrinshara xawisino garinni; Sidaamu qoqqowira qara quchuma ikkino Hawaasi quchumi giddo loosamanni leellannohu lee bixxille lamala kiilo meetire koriiderete latishshi quchumaho turizimete millimmora injiino akata kalaqanno.
Quchumaho umi doycho koriiderete latishshi loosira doorantino qooxeessubba aana babbaxxitino asso amaddino loossa harinsanni hee’noonnita kayise; kuri giddonnino Membo Hoteelenni Riferaalete Hospitaale xawi geeshsha mitte bixxille mitte kiilo meetire diwanno loosi xibbuunni 90 anga ali loosi jeefisamino yiino.
Shaafeetate xawinni Sawuzi Ispiringi (South Spring) geeshsha hattono mereershu tayishshinni Baxillu Garbi/Fiqir Hayqi) geeshshanna Taaboori Umi Dirimi Rosi Mininni Giloobaali Garaazhe geeshsha xaphoomunni onte bixxille lee kiilo meetire ikkitanno doogo sanadete, dizayinete qixxaawonna riqiwote baatooshshe labbannori balaxote qixxaawo loossa jeefisanteenna loosoho qixxaabbinota egensiisino.
Harunsineno albira hige fulino huxxanna doogimaru qacce minna diigate hattono doogga halashshatenni latishshu loosira e’nannita xawisino.
Koriiderete latishshi injiitinota lekkaanchu doogo, wiliiliweelo hodhishsha halashshate kaa’litannota shalleettete doogo, haanja latishsha, fooliishshote base (fawunteene), boohaarshu, ooso godo’litannowanna ispoortete owaantubba base amadannoha ikkinota egensiisino.
Ledotenni quchumaho doogo halashshate loossa loosantanni nooha ikkanna; 30 kayisse 50 meetire geeshsha hala’linyu noonsarinna xaphoomunni 35 kiilo meetire dibbannoti 10 doogga xiinxallo goofeenna yoo agadhite noota coyi’rino.
Kalaa Desta xawishshi garinni; quchumu turistete mereersha ikkate widoonni boohaarretenna heeshshote injiitinoreeti yinanniri giddo mittoho. Koriiderete latishshi quchumu dana agarrannihura aleenni luphi assannohonna investimentete injiino akata kalaqannoho.
Qoleno quchumu noosiha turizimete goshooshaanchimmanna dooramaanchimma lossatenni quchumahono ikko qoqqowoho turizimete millimmora injiino akata kalaqannoha ikkasi egensiisino.
Gaazeexu Odeessaanchinni
Bakkalcho Bocaasa 5, 2017 M.D
