Addis Ababa:- Turizimete handaarinni hananfoommo millimmo kaajjinshe sufisatenni Itophiyu bikka kalqete xawinseemmo yee xaphoomu ministirchi Abiy Ahimed (D/r) xawisi.
Xaphoomu ministirchi Abiy Ahimed (D/r) Sebeqa garbi aana ijaarroonniha Beenuna qacha sambatu barra maassi`re fanino.
Beenuna qachi qarrissanno akatubba dandiine uurrine gobba jawaantetenni soorrate rosicho adhinanniha ikkasi
xawisino. Beenuna qachi “Dandiineemmo” ammano hegere naqaashsheetino yiino xaphoomu ministirchi.
Beenuna qachi Sebeqa Garbi qaccera lowontanni yannaasincho gonxanni kifilla, hara, sinimu mine, gangalatu bayichubba, ispa, hattono laalote gumi latishshanna maatete jireenya /leemat turrufaat/ mitteenni amadinoho.
Qachu ijaarshino budillaancho ijaaru hayyo yannaasinchu ijaari ledo qineesse amadinoha ikkanna; qooxeessaho ledote turizimete dhuka kalaqino biifado gawalooti.
Xaphoomu ministirchi Abiy Ahimed (D/r) qacha maassi`re fani yannara sayisino sokkanni; Beenuna qachi “dandiineemmo” ammano illenkenni la`noommoho yiino.
Qooxeessu lowo geeshsha qarrisanno diilallote gadinna baattote ofollo noosita xawise; konne dandiine uurratenni biifado qacha adda assa dandiinoonni yiino.
Kunino jifo Itophiya soorratenni uurrissannokkita wirro buunxoommoho yeeno coyi`rino.
Qachu gangalatu bayichubbanni ledote laalote gumi latishshanna maatete jireenya /leemaat turrufaat/ mitteenni amadasi qole gibirinna turizimete iillo ledo qineessate rosicho adhinanniha ikkasi daafira xawisino.
Qachaho burtukaanete, loomete, paappaayunna maangote latishsha hattono lukkuwa, gaango, lalonna me“e ce“ate looso gumullanni hee`noonnitano xawisino.
Beenuna qachi ijaarshino Itophiyu mootimmanni, hallanyu handaarinna halantino Arabete Emreetise mootimma halammenni gumulaminoha ikkasi xawisino.
Iskay Layiti hoteele qacha angara adhite gashshate looso gumultannotano xaphoomu ministirchi lede egensiisino.
Abbebech Maatewoos
Bakkalcho Bocaasa 5, 2017 M.D
