Addis Ababa:- Amma`note massagaanonna uurrinshuwa dandaamate odeessishsha kaajjishanna sodhino laooshshe biddi assate aana loosa hasiissannonsata xawinsi.
Keeru ministirchi kalaa Binnaalf Anduaalem barete aana xawisino garinni; amma`note uurrinshuwa dandaamate odeessishsha jawaachishanna qansootu mimmitoho hedatenni heedhanno gede qara qeechansa fula hasiissanno.
Amma`no hallanyootunna dagoommate balchoomanna akatooma suwisate dhuki noosenna harunsaanote widoonnino jawu waagi noose yinohu ministirchu; ikkolla Ikkinnina amma`note badooshshubba korkaatinni dagoomu mereero baca babbadamooshshubbanna kipho ka`anna wodanchinanni yino.
Amma`no mittimmatenna kaajjillu buicho ikkitara dandiitannonte gede baala kiphonna gibbo jawaachishara dandiitannota buuxise; babbaxxitino hunaano wolquwa sodhino mashalaqqe tuqisatenni dagoomu keere booreessitanna la`nannitano xawisino.
Baalanti amma`note uurrinshuwa dandaamate odeessishsha jawaachisharanna qansootu mimmitoho hedatenni heedhanno gede assa hasiissannota xawisatenni; uurrinshuwa ayyaanaame irko assatenni dagoomu mereero mittimma jawaachishatenni qara qeechansa fula hasiissannonsata qummeessino.
IFDR pirezidaantichi ambaasaadder Taayye Atsiqesillaase fanote hasaawa assi yannara xawisino garinni; amma`note uurrinshuwa mitteenni hee`rate balchoommanna dagoomitte xaadooshshuwa kaajjishatenni keeru loosira qeechansa fula hasiissanno. Xaa yannara kalqete aana kakkachimmatenna badooshshu hedo mitteenni hee`rate mitiimma ikkitanni daggino yiinohu pirezidaantichu; amma`note uurrinshuwa kakkachimmatenna babbadamate hedo hunate murciraanchimmatenni loosa hasiissannota coyi`rino.
Itophiyu sannate amma`note mereero dandaamanna mitteenni heera leellishshino gobba ikkase buuxise; kiristinnu amma`no balaxxe adhitinonna darante daggino musiliimoota dukkissino gobba ikkase xawisino.
Gobba batinye amma`nubba ayirrisante gutunni heedhannota ikkasenni kalqete jawa lawishsha ikkitinota xawisatenni; amma`note uurrinshuwa gobbate mootimma kaajjishate aana qeechinsa luphiima ikkinota coyi`rino.
“Amma`nubbate dandaamanna gutunni heera halchineemmo kalqe adda assate dandiissannote” yiinohu ambaasaadder Taayye; kalqete aana kakkachimma lexxitanni daasenni amma`note uurrinshuwanni mala hasi`nanni yanna ikkitinota xawisino.
Amma`no qansootu mereero babbadamooshshe hunate buusa ikkite owaattannota buuxise; kaajjado ikkitino mittimma abbate amma`note uurrinshuwanni jawa looso agarrannita xawisino.
Amma`note uurrinshuwa dandaamate, mitteenni hee`raatenna kaa`lamate balchooma kaajjishate ragaanni qeechinsa jawa ikkasinni songotenni amma`note uurrinshuwa gobboomu mittimma kaajjishshanno, gutu qarrubba gutunni tirate dandiissanno hajubba aana illachunni malama hasiissannota coyi`rino.
Keeru ministere yunayitid Areb Emretisi afamanno Mehammed Biin Zayid Foor hiyumaaniti yuniveriste ledo qinaawatenni qixxeessitino kalqoomu amma`note uurrinsha songo tenne lamala giddo harinsoonni.
Abbebech Maatewoos
Bakkalcho Birra 28, 2017 M.D
