Wolayyittu zoone shekkeete xisso qorqoraano gaamo shekkeere gargarate babbaxxitino balaxote qorophote loossa loossanni noota egensiissu. Birra 5/2017 M.D xissote kaajjillinna qorqorranni hayyo ragaanni Sooddote quchumira hasaawa assitino.
Sooddote quchumira assinoonni amaale aana hasaawa assinohu qorqorshu gaamonna Wolayittu zoone qaru gashshaanchi riqiwamaanchi kalaa Taammiraat Bellexe zoonete iibbabbitanni dagginota shekkeerete taraawo fayyimmate ogeeyyenni, massagaano bissanni, dagatenna hajo la`anno bissa beeqqonni gargaranna qorqora dandiinannita buuxisino.
Xisso qorqora hoongummoro kaajjado gawajjo iillishshara dandiitanno yiinohu riqiwamaanchu dagate heeshsho woxxate murciraanchimmatenninna xa`mamooshshu wodaninni loosa baalunku yawooti yiino.
Zoonete shekkeerete qorqorshi gaamo borreessaanchinna biddishshu sooreessi kalaa Tseggaye Ebba isi widoonni; soorrantanni afantannota diilallote gadi soorro harunse zoonete lexxitanni dagginota shekkeerete taraawo gargaratenna qorqorate loossa qorqorshu gaamo illachunni massaggannota kaysino.
Xagisatenni gargarate loosira fushshinanni fulo shiima ikkitinota coyi`re umo shekkeerete xisso sirtanno bayichuwa lolaasatenna tuate looso lede agoberete horonsha jawaachisha lowontanni amaallanni yiino.
Xissamino mancho ogimmate amanyooti garinni xagisa mannihimmatenna mooraalete gadacho ikkinota xawise; xagisiraano qole yawo macciishshantannose fayyimmate uurrinshanni ogeeyyetenni hajanjoonni xagicho garunni horoonsidhanno gede kalaa Tseggaye qummeessino.
Biddishshaho xisso gargaranna fayyimma kaajjishate dayirekitoreete gaamo massagaanchi kalaa Anbessawu Welde hasaawaho shiqishino xiinxallote borronni zoonete sa`u onte dirrara shekkeerete taraawo lexxitanni dagginota buuxise; 2016 M.D goofimarchinni xissote xagisiraano kiiro 100 kumi ale iillitinota xawisino.
Taraawo hunate dandiisanno qinaawinonna taalashsho wo`naalsha assa fayyimmate ogeeyyenni, massagaano bissanni, dagoomunna halamaano uurrinshuwanni agarrannitano buuxisino.
Arekku quchuminna Boloso Bombe woradi fayyimmate agarooshshi borro mini sooreessi isi widoonni uyino hedonni; qooxeessu qorqorsha lifixisate qoteho agoberete horonshi aana leeltanno foonquwa taashshate mixi`re loosanni afamannota xawisino.
Hursaanchimmasi buuxantinokki seerimale xagichu soorrishsha gumultannorinna ogimmate seera kaddanno hallanyooti aana seeru qaafo adhinanni afammannitano buuxisino.
Abbebech Maatewoos
Bakkalcho Birra 14, 2017 M.D
